លោក Arsene Wenger បានបង្ហើបថា Cristiano Ronaldo អាចទៅចូលរួមជាមួយ Arsenal ជំនួសឲ្យ Manchester United ក្នុងឆ្នាំ ២០០៣។ អតីតអ្នកចាត់ការសញ្ជាតិបារាំងរូបនេះ ក៏បានសារភាពថាការមិនបានចុះហត្ថលេខាលើខ្សែប្រយុទ្ធរូបនេះគឺជាការសោកស្តាយដ៏ធំបំផុតរបស់គាត់។
Wenger ត្រូវបានគេចាត់ទុកថាជាអ្នកចាត់ការល្អបំផុតម្នាក់ក្នុងប្រវត្តិសាស្ត្រ Premier League។ អតីតគ្រូបង្វឹកសញ្ជាតិបារាំងរូបនេះបានចូលដឹកនាំក្លឹប Arsenal ក្នុងឆ្នាំ ១៩៩៦ និងបានគ្រប់គ្រងក្លឹបអស់រយៈពេល ២២ ឆ្នាំ មុនពេលចុះចេញពីតំណែងនៅឆ្នាំ ២០១៨ ។
កំឡុងពេលលោកជាគ្រូបង្វឹកក្រុម Arsenal លោក Wenger បានដឹកនាំក្លឹបឈ្នះពានរង្វាន់ចំនួន ១៧ រួមទាំងពានរង្វាន់ Premier League ចំនួនបី។ អតីតគ្រូបង្វឹកវ័យ ៧២ ឆ្នាំរូបនេះក៏ជាអ្នកចាត់ការក្រុមកាំភ្លើងធំផងដែរ នៅពេលដែលពួកគេឆ្លងកាត់ពេញមួយរដូវកាលមិនដែលចាញ់ ហើយទទួលបានរហស្សនាមថា ‘The Invincibles’ ក្នុងឆ្នាំ ២០០៤ ។
Arsenal បានឈ្នះជើងឯក Premier League ក្នុងរដូវកាល ២០០៣-២០០៤ ខណៈពេលដែលមិនស្គាល់ភាពចាញ់។ ការឈ្នះពានជា Invincibles ត្រូវបានចាត់ទុកថាជាសមិទ្ធិផលដ៏ធំបំផុតមួយរបស់លោក Wenger ក្នុងនាមជាអ្នកគ្រប់គ្រង។
មនុស្សម្នាក់ដែលខកខានឱកាស ក្លាយជាផ្នែកមួយនៃក្រុមប្រវត្តិសាស្ត្រគឺ Ronaldo។ លោក Wenger បានបង្ហើបថា Arsenal ជិតនឹងចុះហត្ថលេខាលើកីឡាករអន្តរជាតិព័រទុយហ្គាល់ពី Sporting Lisbon មុនពេលដែលគាត់បានចូលរួមជាមួយ Manchester United នៅរដូវក្តៅឆ្នាំ ២០០៣ ។
ទោះបីជាយ៉ាងណាក៏ដោយ Ronaldo នឹងមិនមានការសោកស្ដាយច្រើន ចំពោះការមិនបានចូលរួមជាមួយក្រុម Arsenal ខណៈដែលគាត់បានបន្តទទួលបានភាពជោគជ័យដ៏សំខាន់ជាមួយក្រុម Manchester United ។ គាត់បានជួយបិសាចក្រហមឈ្នះពានប្រាំបួន មុនពេលចូលរួមជាមួយ Real Madrid ក្នុងឆ្នាំ ២០០៩៕
សូមទស្សនាវីដេអូខាងក្រោម៖
