កីឡាករ Marcelo នៅរដូវកាល ២០២១/២២ គេបានបង្ហាញខ្លួនតែ ២ ប្រកួតគត់ ដោយសារជួបបញ្ហារបួសក៏នាំឲ្យគេខកខានមកទល់សព្វថ្ងៃ។ ខណៈដែលអនាគតរបស់កីឡាករប្រេស៊ីល ជាមួយក្លឹប Real Madrid អាចនឹងឈានដល់ផ្លូវបែក ស្របពេលដែលសុពលភាពកុងត្រារបស់គេ កៀកនឹងត្រូវផុតនៅបញ្ចប់រដូវកាលផង។
បើតាមសារព័ត៌មាន El Nacional បានឲ្យដឹងថា Marcelo គេមានចិត្តចង់ចែកផ្លូវពីក្លឹបម្ចាស់ដី Bernabeu ដោយគេក៏បានជូនដំណឹងទៅកាន់ប្រធានក្លឹបលោក Florentino Perez រួចហើយដែរ។
ផ្ទុយមកវិញ គេចង់ត្រលប់ទៅក្លឹបចាស់គឺ Fluminense នៅឯប្រទេសកំណើត ព្រោះគិតថាពេលវេលាក្នុងអាជីពបាល់ទាត់ គួរតែឈានមកដល់ទីបញ្ចប់ និងចង់ចូលនិវត្តជាមួយក្លឹបចុងក្រោយនោះតែម្តង។
គួរបញ្ជាក់ដែរថា Marcelo ក្នុងអាជីពរបស់គេ ក្រៅពី Real គឺគេឈរជើងឲ្យក្លឹប Fluminense តែមួយគត់ ដោយស្ថិតិជារួមក្នុងនាមជាកីឡាករ ៥៤១ ប្រកួត រកបាន ៤១ គ្រាប់ និង Assist បាន ១០១ លើក ហើយធ្លាប់ឈ្នះពានធំ UCL ដល់ទៅ ៤ សម័យកាលឯណោះ៕
