អ្នកចាត់ការក្រុម Manchester United លោក Ole Gunnar Solskjaer បាននិយាយថា លោកនឹងនៅតែជ្រើសរើស Cristiano Ronaldo នាំមុខ Mohamed Salah ជាកីឡាករល្អបំផុតក្នុងពិភពលោក ដែលវាជាការឆ្លើយតបទៅនឹងការលើកឡើងរបស់លោក Jurgen Klopp ។
ថ្លែងនៅមុនការប្រកួតរបស់ Manchester United ទល់នឹង Liverpool លោក Solskjaer បានបញ្ជាក់ថា Cristiano Ronaldo នៅតែជាកីឡាករបាល់ទាត់ល្អបំផុតនៅលើភពផែនដី ដោយសារតែកំណត់ត្រាស៊ុតបញ្ចូលទីដ៏អស្ចារ្យរបស់គាត់។
ទោះជាយ៉ាងណាក៏ដោយ អ្នកចាត់ការទូទៅរបស់ Manchester United ក៏បានការទទួលស្គាល់គុណសម្បត្ដិរបស់ Mohamed Salah និងបានសរសើរពីគ្រាប់បាល់ដែលគាត់បានរកបាននាពេលថ្មីៗនេះ។
Solskjaer ក៏បានលើកសរសើរដល់កីឡាករពីររូបផ្សេងទៀត ក្នុងតំបន់ប្រយុទ្ធដ៏សាហាវរបស់ Liverpool ដែលមានដូចជា Sadio Mane និង Roberto Firmino ។ អ្នកចាត់ការសញ្ជាតិន័រវេសរូបនេះ បាននិយាយថា៖ «ខ្ញុំនឹងគាំទ្រ Cristiano ជានិច្ចក្នុងការប្រកួតប្រជែងណាក៏ដោយ។ មានតែគាត់មួយគត់ ហើយកំណត់ត្រារកគ្រាប់បាល់របស់គាត់ពិតជាអស្ចារ្យ ប៉ុន្តែបើនិយាយឱ្យចំគឺ Salah កំពុងលេចធ្លោ។ អ្នកឃើញគ្រាប់បាល់ខ្លះដែលគាត់បានស៊ុតថ្មីៗនេះហើយ យើងនឹងលេងឲ្យអស់ពីសមត្ថភាពទល់នឹងគាត់»។
«ប៉ុន្តែយើងត្រូវតែប្រយ័ត្ន និងលេងឲ្យបានល្អបំផុត ព្រោះតំបន់ខាងលើរបស់ហង្សក្រហមពិតជាល្អ ដូចជាកីឡាករ Sadio Mane, Roberto Firmino ហើយប្រហែលជា Diogo Jota នឹងលេងក្នុងប្រកួតនេះ។ ពួកគេគឺជាកីឡាករដែលយើងត្រូវផ្តោតការយកចិត្តទុកដាក់ខ្លាំងបំផុត»៕
