លោក Nagelsmann ត្រូវបានចាត់ទុកថាជាគ្រូបង្វឹកវ័យក្មេងដ៏ឆ្នើមមួយរូបនៅអឺរ៉ុប ដោយបានបង្កើនបទពិសោធន៍ដឹកនាំការប្រកួតនៅ Hoffenheim និង RB Leipzig មុនពេលទៅដឹកនាំ Bayern។
បុរសជនជាតិអាល្លឺម៉ង់រូបនេះ មិនសូវជាជោគជ័យប៉ុន្មាននោះទេ ក្នុងពេលជាកីឡាករ ដោយបានចូលនិវត្តពីអាជីពនេះ ត្រឹមអាយុ២០ឆ្នាំ ដោយសារបញ្ហារបួស ប៉ុន្ដែលោកបានទម្លាយឱ្យដឹងថា កាលនៅជាកីឡាករលោកបានយកគម្រូតាម អតីតខ្សែការពារ Terry។
នៅពេលត្រូវបានសួរថា តើកីឡាកររូបណាដែលបានជួយកសាងភាពច្នៃប្រឌិតផ្នែកគំនិតជាគ្រូបង្វឹកដ៏វ័យក្មេងម្នាក់ លោក Nagelsmann បានថ្លែងប្រាប់ The Times ថា៖ “John Terry។ វាពិតជាអស្ចារ្យ ព្រោះនៅពេលដែលខ្ញុំនៅជាកីឡាករវ័យក្មេង ខ្ញុំលេងជាមួយ Christian Trasch។ ខ្ញុំបានហៅគាត់ថា Patrick – Patrick Vieira ព្រោះគាត់លេងក្នុងតំណែងកីឡាករលេខ៦ ហើយគាត់ហៅខ្ញុំថា John Terry, Johnny”។
“នៅពេលនោះ Terry ជាខ្សែការពារកណ្ដាលដ៏ល្អបំផុតមួយរូប ខ្ញុំគិតថាមានមួយរដូវកាល គាត់មិនដែលចាញ់នៅក្នុងការប្រជែងបាល់សូម្បីម្ដង។ គាត់មានភាពឆ្លាតវៃទៅនឹងការប្រើក្បាល។ ខ្ញុំប្រើជើងលេងបានល្អ ប៉ុន្ដែមានភាពប្រសើរក្នុងការលេងក្បាល ហើយមានភាពស្រដៀងគ្នាមួយចំនួន គាត់ជាប្រភេទនៃកីឡាករគម្រូ”៕
