លោក John Arne Riise អតីតខ្សែការពារក្រុមហង្សក្រហម Liverpool គិតថា Erling Haaland គឺជាកីឡាករដ៏អស្ចារ្យម្នាក់ដែលស័ក្តិសមនឹងទម្រង់លេងរបស់លោក Jurgen Klopp ។ Riise រំពឹងទុកថាមាន Haaland លេងឱ្យ Liverpool ហើយជឿជាក់ថាខ្សែប្រយុទ្ធន័រវេស នឹងរីករាយជាមួយមនុស្សដូចជា Klopp ។
អតីតខ្សែការពាររូបនេះ បាននិយាយទៅកាន់សារព័ត៌មាន Goal ថា៖ “ ខ្ញុំពិតជាចង់ឃើញគាត់លេងនៅ Liverpool ព្រោះគាត់ជាកីឡាករដែលអស្ចារ្យ។ គាត់មានទម្រង់លេងល្អ ហើយខ្ញុំគិតថាគាត់សមនឹងទម្រង់លេងរបស់លោក Jurgen Klopp ។ ខ្ញុំក៏គិតថាគាត់នឹងស្រឡាញ់ Liverpool ក្នុងនាមជាក្លឹបមួយដែរ” ។
Riise ក៏ជឿជាក់ផងដែរថាក្លឹបណាដែលចុះហត្ថលេខាលើ Haaland នឹងក្លាយជាក្រុមដែលគួរឱ្យខ្លាច។ នោះហើយជាមូលហេតុដែលគាត់ចង់ឱ្យ Liverpool ចុះហត្ថលេខាលើកីឡាករវ័យ ២១ ឆ្នាំរូបនេះពីក្លឹប Borussia Dortmund ។
បញ្ជាក់ផងដែរថា Erling Haaland នឹងក្លាយជាកីឡាករម្នាក់ ក្នុងចំណោមកីឡាករដែលមានក្លឹបផ្សេងចង់បានច្រើនបំផុតនៅរដូវក្តៅខាងមុខនេះ។ កីឡាករវ័យ ២១ ឆ្នាំរូបនេះមានតម្លៃផ្តាច់កុងត្រា ៧៥ លានផោននៅក្នុងកិច្ចសន្យារបស់គាត់ជាមួយក្លឹប Dortmund ដែលនឹងត្រូវដាក់ឲ្យដំណើរការនៅរដូវក្តៅក្រោយ។ ក្លិបផ្សេងៗត្រូវបានផ្សារភ្ជាប់ជាមួយនឹងការផ្លាស់ប្តូរមួយសម្រាប់ Haaland រួមមាន Manchester United, Liverpool, Chelsea និង Real Madrid៕
