បន្ទាប់ពីព្រឹត្តិការណ៍នេះត្រូវបានពន្យារពេលកាលពីឆ្នាំមុន ពានរង្វាន់ Ballon d’Or ដ៏មានកិត្យានុភាពដែលទទួលបានដោយ France Football បានត្រលប់មកវិញហើយ ដែលពានរង្វាន់ប្រចាំឆ្នាំ ២០២១ នឹងត្រូវបង្ហាញនៅថ្ងៃទី ២៩ ខែវិច្ឆិកា។
ពានរង្វាន់សម្រាប់កីឡាករបាល់ទាត់បុរសល្អបំផុតនៅលើពិភពលោក នឹងត្រូវបានបោះឆ្នោតដោយអ្នកសារព័ត៌មានចំនួន ១៨០នាក់ ហើយបញ្ជីឈ្មោះកីឡាករ ៣០នាក់ នឹងត្រូវបង្ហាញឈ្មោះនៅថ្ងៃទី ៨ ខែតុលា។
ពានរង្វាន់សម្រាប់កីឡាការិនីល្អបំផុត ដែលជាពានលើកទី៣ នឹងត្រូវបោះឆ្នោតដោយអ្នកសារព័ត៌មានចំនួន ៥០ រូប។ ទន្ទឹមនឹងនេះដែរ ពានរង្វាន់ Kopa Trophy ដែលរៀបចំឡើងដោយសហព័ន្ធបាល់ទាត់បារាំង នឹងត្រូវបោះឆ្នោតដោយអតីតម្ចាស់ពានរង្វាន់ Ballon d’Or ចំនួន ៣២ នាក់ ដោយជ្រើសរើសយកបញ្ជីឈ្មោះ ១០ នាក់ដំបូង។
រង្វាន់សម្រាប់អ្នកចាំទីល្អបំផុត គឺពានរង្វាន់ Yashin Trophy នឹងត្រូវបោះឆ្នោតដោយគណៈវិនិច្ឆ័យដូចគ្នា នឹងពានរង្វាន់បាល់មាសបុរសដែរ។ ពានរង្វាន់ទាំងអស់នេះនឹងត្រូវប្រគល់ជូននៅក្នុងព្រឹត្តិការណ៍ ហ្គាឡា នៅឯ Chatelet Theatre ក្នុងទីក្រុងប៉ារីស នៅថ្ងៃទី ២៩ ខែវិច្ឆិកា។
រំលឹកឡើងវិញផងដែរថា អ្នកឈ្នះពានរង្វាន់ឆ្នាំ ២០១៩ រួមមាន៖
– ពានរង្វាន់ Ballon d’Or បុរស៖ Lionel Messi
– ពានរង្វាន់ Ballon d’Or របស់ស្ត្រី៖ Megan Rapinoe
– ពានរង្វាន់អ្នកចាំទីល្អបំផុត Yashin Trophy៖ Alisson Becker
– ពានរង្វាន់ Kopa Trophy៖ Matthijs de Ligt ៕
