អាយុគ្រាន់តែជាតួលេខ ប៉ុន្តែវាមិនបានធ្វើឲ្យប៉ះពាល់ដល់ខ្សែប្រយុទ្ធសញ្ជាតិព័រទុយហ្កាល់ Cristiano Ronaldo នោះទេ ព្រោះគុណភាពនៃការរកគ្រាប់បាល់របស់គាត់មិនបានថមថយឡើយ ទោះបីជាស្ថិតក្នុងអាយុ ៣៦ឆ្នាំក៏ដោយ។
ចាប់តាំងពីវិលត្រឡប់មកកាន់ទឹកដី Old Trafford វិញ ខ្សែប្រយុទ្ធរបស់ក្រុមបិសាចក្រហម Manchester United រូបនេះបានស៊ុតបាល់បញ្ចូលទី ៤ គ្រាប់ក្នុងការប្រកួត ៣ លើកចុងក្រោយរបស់គាត់ទល់នឹង Newcastle, West Ham និង Young Boys។
នៅក្នុងការប្រកួតចុងក្រោយនេះម្ចាស់អាវលេខ ៧ ថែមទាំងបង្ហាញពីល្បឿនដ៏អស្ចារ្យ ដែលមានល្បឿនអតិបរមា ៣២.៥១ គីឡូម៉ែត្រក្នុងមួយម៉ោង នោះមានន័យថាគាត់បានបញ្ចប់ការប្រកួតក្នុងនាមជាកីឡាករបាល់ទាត់លឿនបំផុតនៅលើទីលាន ដែលប្រហាក់ប្រហែលនឹងកីឡាករ Aaron Wan-Bissaka និង Jarrod Bowen ។
អ្នកចាត់ការទូទៅក្រុមបិសាចក្រហម Manchester United លោក Ole Gunnar Solskjaer បានលើកសរសើរ Ronaldo បន្ទាប់ពីការបង្ហាញទម្រង់លេងរបស់គាត់ទល់នឹងក្រុម West Ham ។ គ្រូបង្វឹករូបនេះបាននិយាយថា៖ «CR7បានបង្ហាញឲ្យដៃគូឃើញពីភាពគ្រោះថ្នាក់របស់ខ្លួន និងធ្វើឲ្យ Man Utd ក្លាយមកជាក្រុមដ៏គួរឲ្យខ្លាចជាមួយតិកនិករកគ្រាប់បាល់របស់ Ronaldo»៕
