ខ្សែប្រយុទ្ធវ័យក្មេង Ansu Fati បានសម្រេចការហ្វឹកហាត់បានពេញលេញ ជាមួយមិត្តរួមក្រុម Barcelona កាលពីថ្ងៃអង្គារ បន្ទាប់ពីសម្រាកព្យាបាលរបួសជង្គង់អស់រយៈពេលជិត ១០ខែ។
Barcelona រំពឹងថា Fati នឹងត្រលប់មកបង្ហាញខ្លួនលើទីលានវិញបាន នៅពាក់កណ្ដាលខែកញ្ញាខាងមុខនេះ ពោលគឺបន្ទាប់ពីសម្រាកប្រកួតជម្រើសជាតិ មានន័យថាគឺការប្រកួតក្រៅដីទល់នឹង Sevilla។
ការត្រលប់មកវិញរបស់ Fati កាន់តែខិតជិតចូលមកដល់ ខណៈរូបគេហើយនឹងក្លិប ក៏មិនប្រញាប់ប្រញាល់ប៉ុន្មានដែរ ដោយត្រូវការពេលរង់ចាំរហូតដល់គេជាសះស្បើយពេញលេញជាថ្មី។
គួររំលឹកថា កាលពីដើមខែសីហានេះ កីឡាករសញ្ជាតិអេស្ប៉ាញ វ័យ ១៨ឆ្នាំរូបនេះ បានចាប់ផ្ដើមហ្វឹកហាត់ដាច់ដោយឡែក នៅលើទីលានក្នុងជំរុំហ្វឹកហាត់របស់ Barca ប៉ុន្ដែបច្ចុប្បន្នគេអាចចូលរួមជាមួយកីឡាករដទៃទៀតសារជាថ្មី៕
