កីឡាករ Willian ប្រឈមនឹងកំហឹងរបស់អ្នកគាំទ្រក្រុម កាំភ្លើងធំ Arsenal បន្ទាប់ពីខ្សែបម្រើរូបនេះ បានចុច Like លើរូបភាពអបអរជ័យជម្នះ ដែលក្រុមតោខៀវ Chelsea បានបង្ហោះនៅលើគណនីបណ្ដាញសង្គមផ្លូវការ ក្រោយពួកគេទទួលបានជ័យជម្នះនៅក្នុងទឹកដី Emirates ។
ជាការពិតណាស់ ក្រុមម្ចាស់ជើងឯក Champions League រដូវកាលមុន Chelsea បានយកឈ្នះលើក្រុមលោក Mikel Arteta ក្នុងលទ្ធផល ២ ទល់នឹង ០ កាលពីយប់ថ្ងៃអាទិត្យ ដោយ ២គ្រាប់នោះរកបានដោយខ្សែប្រយុទ្ធចំណូលថ្មី Romelu Lukaku និង Reece James ។
សម្រាប់ការប្រកួតយប់មិញនេះ ខ្សែបម្រើសញ្ជាតិប្រេស៊ីលវ័យ ៣៣ឆ្នាំរូបនេះ មិនបានចូលរួមនោះទេ ដោយសារតែបានតេស្ដវិជ្ជមានកូវីដ-១៩។ ប៉ុន្ដែរូបគេបានធ្វើសកម្មភាពនៅលើបណ្ដាញសង្គម ដោយបានចុច Like លើរូបភាពអបអរជ័យជម្នះរបស់អតីតក្រុម Chelsea ។
Willian ហាក់ពុំទាន់បង្ហាញទម្រង់លេងបានល្អ គួរឲ្យកត់សម្គាល់ឡើយ ក្រោយផ្ទេរមកពីក្រុម Chelsea កាលពីរដូវក្ដៅឆ្នាំ២០២០ ហើយមានដំណឹងថា រូបគេនឹងអាចផ្ទេរចេញទឹកដី Emirates នៅមុនទីផ្សារដោះដូរកីឡាករនារដូវក្ដៅនេះ បិទបញ្ចប់ផងដែរ៕
សូមទស្សនាវីដេអូខាងក្រោម៖
