ការស្វែងរកអ្នកចាំទីថ្មីរបស់ Arsenal ហាក់ដូចជាខិតជិតមកដល់ហើយ។ ក្រុមកាំភ្លើងធំត្រូវបានគេភ្ជាប់ជាមួយបេក្ខភាពអ្នកចាំទីពីរបីនាក់ ក្នុងរយៈពេលប៉ុន្មានសប្តាហ៍ចុងក្រោយនេះ ហើយឥឡូវនេះពួកគេកំពុងពិចារណា ថាតើអ្នកណានឹងត្រូវចុះហត្ថលេខា។
យោងតាមរបាយការណ៍បានអោយដឹងថា ក្លឹបដែលមានមូលដ្ឋាននៅទីក្រុងឡុងដ៍មួយនេះ កំពុងល្បួងចង់បានអ្នកចាំទី Aaron Ramsdale របស់ក្រុម Sheffield United មកកាន់កីឡដ្ឋាន Emirates នារដូវក្តៅនេះ។ ការពិភាក្សាត្រូវបានគេនិយាយថា កំពុងបន្តរវាងភាគីទាំងពីរ ដោយ Arsenal ជឿជាក់ថាកិច្ចព្រមព្រៀងមួយ នឹងត្រូវបានសំរេចក្នុងពេលឆាប់ៗនេះ។
ក្រុមកាំភ្លើងធំកំពុងអស់សង្ឃឹម ក្នុងការបន្តកុងត្រាលើអ្នកចាំទីបម្រុង Bernd Leno មុនពេលយុទ្ធនាការ Premier League ថ្មីចាប់ផ្តើម។ មុននេះវាហាក់ដូចជាកៀកនឹងចុះហត្ថលេខាជាមួយ Andre Onana របស់ Ajax បន្ទាប់ពីបានទាក់ទងជាមួយអ្នកចាំទីសញ្ជាតិកាមេរូនរូបនេះ ប៉ុន្តែនៅទីបំផុតពួកគេបានប្តូរការចាប់អារម្មណ៍ទៅរក ធនធានដែលមានស្រាប់នៅក្នុងក្លិប។
របាយការណ៍នេះក៏បានលើកឡើងផងដែរថាក្រុម Sheffield United បានដាក់សំណើរតម្លៃ ៣០ លានផោនលើ Ramsdale ។ ក្រុមកាំភ្លើងធំ Arsenal ត្រូវបានគេរំពឹងថានឹងបង់ប្រាក់ជាមុនចំនួន ២៤ លានផោនសម្រាប់អ្នកចាំទីជនជាតិអង់គ្លេសរូបនេះ ហើយប្រាក់ដែលនៅសល់ចំនួន ៦ លានផោនត្រូវបានរៀបចំសម្រាប់ប្រាក់រង្វាន់បន្ថែម។
បញ្ជាក់ផងដែរថា អ្នកចាំទីរូបនេះបានបង្ហាញខ្លួនចំនួន ៣៨លើកសម្រាប់ក្រុម Sheffield ក្នុងក្របខ័ណ្ឌ Premier League កាលពីរដូវកាលមុន និងត្រូវបានបញ្ចូលក្នុងក្រុមជម្រើសជាតិអង់គ្លេស សម្រាប់ការប្រកួតពានរង្វាន់អឺរ៉ុបនៅរដូវក្តៅនេះផងដែរ។ គាត់មានកិច្ចសន្យាជាមួយ Sheffield រហូតដល់រដូវក្តៅឆ្នាំ ២០២៤ ។
ការបង្ហាញសមត្ថភាពដ៏អស្ចារ្យរបស់ Ramsdale បានធ្វើឱ្យគាត់ស្ថិតនៅលើរ៉ាដានៃក្លិបជាច្រើននៅ Premier League ហើយវានឹងមិនមានការភ្ញាក់ផ្អើលទេ ដែលឃើញគាត់បង្ហាញខ្លួននៅក្នុងក្របខ័ណ្ឌកំពូលអង់គ្លេស នៅរដូវកាលក្រោយ៕
