លោក Mauricio Pochettino ត្រូវបានក្លឹប Paris Saint-Germain ផ្តល់សេចក្តីទុកចិត្ត និងបានបន្តកុងត្រា រយៈពេល ២ឆ្នាំបន្ថែមទៀត ដែលមានន័យថា អ្នកចាត់ការរូបនេះអាចបន្តដឹកនាំ PSG រហូតដល់ឆ្នាំ ២០២៣។
PSG បានចុះហត្ថលេខានាំយកលោក Mauricio Pochettino មកកាន់ទឹកដី Parc des Princes កាលពីខែមករា បន្ទាប់ពីអ្នកចាត់ការរូបនេះ ត្រូវបាន Tottenham Hotspur បណ្តេញចេញពីតំណែងកាលពីខែ វិច្ឆិកា ឆ្នាំ ២០១៩ ដែលពេលនោះត្រូវបានជំនួសដោយលោក Jose Mourinho។
ចាប់តាំងពីចូលរួមជាមួយ PSG កាលពីដើមឆ្នាំ Pochettino មិនអាចនាំមកនូវភាពជោគជ័យ ដែលក្លឹបបានទាមទារនោះទេ។ ក្រុម PSG បានបរាជ័យក្នុងការដណ្តើមយកពានរង្វាន់ Ligue 1 របស់ពួកគេ ដោយចាញ់ក្រុម Lille OSC មួយពិន្ទុ។ ក្រុមជើងខ្លាំងរបស់បារាំងមួយនេះ ក៏ខកចិត្តក្នុងការប្រកួត Champions League ផងដែរ ដោយចាញ់នៅវគ្គពាក់កណ្តាលផ្តាច់ព្រ័ត្រ ក្រោមថ្វីជើងក្រុម Manchester City៕
