ខ្សែប្រយុទ្ធ Eden Hazard ត្រូវបានគេរាយការណ៍ថាចង់ចាកចេញពីក្លិបអធិរាជស Real Madrid នៅរដូវក្ដៅខាងមុខនេះដោយប៉ងចង់ត្រឡប់ទៅលេងនៅក្លិបតោខៀវ Chelsea វិញ។
ខ្សែប្រយុទ្ធប៊ែលហ្ស៊ិកវ័យ ៣០ឆ្នាំរូបនេះ បានផ្ទេរពី Chelsea មកកាន់ Real Madrid នៅឆ្នាំ២០១៩ ក្នុងតម្លៃខ្លួន ១៣០លានផោន (ស្មើនឹងប្រមាណ១៨៣.៦លានដុល្លារអាមេរិក) ប៉ុន្តែរូបគេហាក់មិនសូវកាប់កបនៅទីនេះប៉ុន្មានទេ ព្រោះរងរបួសញឹកញាប់ពេក ដោយបានបង្ហាញខ្លួនតែ១០ប្រកួតប៉ុណ្ណោះនៅក្របខណ្ឌ La Liga និង៣ប្រកួតនៅ Champions League ផងដែរ។
Hazard ក៏ត្រូវទទួលរងការរិះគន់ពីសំណាក់អ្នកគាំទ្រយ៉ាងចាស់ដៃក្រោយគេសើចសប្បាយជាមួយអតីតមិត្តរួមក្រុម Chelsea ក្រោយក្លិបចាស់របស់គេបានទម្លាក់ Real Madrid ចេញពីពាន Champions League ត្រឹមវគ្គពាក់កណ្ដាលផ្ដាច់ព្រ័ត្រ ទើបគេត្រូវបង្ខំចិត្តធ្វើការសុំទោស។
