ភ្នំពេញ៖ លោកឧត្ដមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានបញ្ជាឲ្យកម្លាំងជំនាញចុះស្រាវជ្រាវ និងបង្ក្រាបករណីចាប់មនុស្ស ដាក់រថយន្តជំរិតទារប្រាក់ រំដោះបានស្ត្រីជនជាតិចិនម្នាក់ កាលពីវេលាម៉ោង ៦ព្រឹកថ្ងៃទី១៤ ខែសីហា ឆ្នាំ២០២០ ត្រង់ចំណុចព្រែកត្រែង ស្រុកស្ទឹងហាវ ខេត្តព្រះសីហនុ ។
ករណីចុះបង្ក្រាបនេះ ក្រោយពីលោកស្នងការខេត្តព្រះសីហនុ បានទទួលដំណឹងថា កាលពីថ្ងៃទី១៣ ខែសីហា ឆ្នាំ២០២០ មានករណីចាប់មនុស្សបញ្ចូល ក្នុងរថយន្តនៅចំណុចហាង លក់សម្លៀកបំពាក់យីហោ កូកូ កែងមហោស្រពចាស់ ក្នុងសង្កាត់លេខ២ ក្រុងព្រះសីហនុ ។
ចំណែកជនសង្ស័យមានគ្នា ៣នាក់ បានរត់គេចខ្លួនបាត់ស្រមោល ។ ជនសង្ស័យទាំង ៣នាក់ មានភិនភាគដូចខាងក្រោម៖
១-មនុស្សប្រុស ពាក់អាវយឺតដៃខ្លី ពណ៌ខៀវចាស់ ស្លៀកខោខ្មៅជើងវែង ពាក់មួកខ្មៅ ។
២-មនុស្សប្រុស ពាក់អាវយឺតដៃខ្លីពណ៌ខ្មៅ ស្លៀកខោខ្មៅជើងវែង ពាក់មួកខ្មៅ ។
៣-អ្នកបើកបរម្នាក់ មិនចុះពីលើរថយន្ត ។
ជនសង្ស័យជិះរថយន្តម៉ាក ហាយឡេនឌ័រ (HIGHLANDER) ពណ៌ទឹកមាស មិនចាំស្លាកលេខ បានធ្វើសកម្មភាពចាប់មនុស្ស ស្រីម្នាក់ពាក់រូបពណ៌ខ្មៅ ដាក់ចូលទៅក្នុងរថយន្ត រួចធ្វើដំណើរឆ្ពោះទៅផ្លូវជាតិលេខ៤ ។
បន្ទាប់ពីទទួលបានដំណឹងនេះភ្លាមៗ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានដាក់បទបញ្ជាឲ្យ លោកវរសេនីយ៍ឯក លី សុខហ៊ី នាយការិយល័យនគរបាល ព្រហ្មទណ្ឌកម្រិតស្រាល ដឹកនាំកម្លាំងជំនាញចុះស្រាវជ្រាវជាបន្ទាន់ រហូតដល់វេលាម៉ោង ៦ព្រឹកថ្ងៃទី១៤ ខែសីហា ឆ្នាំ២០២០ ត្រង់ចំណុចព្រែកត្រែង ស្រុកស្ទឹងហាវ ក្រុមសមត្ថកិច្ចជំនាញបាន រំដោះជនរងគ្រោះបានសម្រេច ។ ដោយឡែកជនសង្ស័យ កំពុងរត់គេចខ្លួនបាត់អស់ ៕
