ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបន្តអំពាវនាវឲ្យបងប្អូនប្រជាពលរដ្ឋ ថែរក្សាសុខភាព ដើម្បីចៀសផុតពីកូវីដ១៩ ជាពិសេសត្រូវមានការប្រុងប្រយ័ត្នខ្ពស់ ចំពោះបាតុភូតខ្យល់កន្ត្រាក់ ។
សម្ដេចតេជោ ហ៊ុន សែន បានសរសេរលើបណ្ដាញសង្គមហ្វេសប៊ុក នៅថ្ងៃទី៦ សីហានេះថា «ខ្ញុំសូមអំពាវនាវ ដល់បងប្អូនប្រជាពលរដ្ឋ យកចិត្តទុកដាក់ថែរក្សា សុខភាពអោយបានល្អ នៅក្នុងរដូវភ្លៀងធ្លាក់ ដោយសារមួយរយៈចុងក្រោយនេះមានភ្លៀង និងខ្យល់កន្ត្រាក់ជាច្រើនលើក ច្រើនសារដែលបានបំផ្លាញ ផ្ទះសម្បែងប្រជាលរដ្ឋអស់ជាច្រើនខ្នង។ ដូច្នេះបងប្អូនត្រូវមានការ ប្រុងប្រយ័ត្នខ្ពស់ជានិច្ច ជាពិសេសក្នុងការ ធ្វើដំណើរជិតឆ្ងាយ» ។
សម្ដេចបន្តថា ចំពោះបងប្អូនប្រជាពលរដ្ឋ ដែលរស់នៅតាមដងទន្លេ តាមសមុទ្រ និងប្រជាពលរដ្ឋដែល ប្រកបរបរចុះទូកនេសាទ សូមមានការប្រុងប្រយ័ត្នខ្ពស់ ត្រូវតាមដានឲ្យបានជាប់នូវ ការផ្សព្វផ្សាយព្យាករណ៍អាកាសធាតុ របស់ក្រសួងធនធានទឹក និងឧតុនិយម ។
សម្ដេចបន្ថែមថា ទន្ទឹមនឹងនេះដែរ ក៏សូមបងប្អូនប្រជាលរដ្ឋ ការពារខ្លួនកុំអោយឆ្លងជំងឺ covid-19 ទោះបីប្រទេសយើង ពុំមានអ្នកស្លាប់ក៏ដោយ ព្រោះជំងឺរលាកផ្លូវដង្ហើមនេះ ឆ្លងរាតត្បាតលឿនសាហាវខ្លាំងណាស់ ហើយក៏ពុំទាន់មាន ថ្នាំព្យាបាលនៅឡើយទេ។
សម្ដេច បានបន្តប្រាប់ឲ្យ បងប្អូនប្រជាពលរដ្ឋ ឧស្សាហ៍ដុសលាងសម្អាតដៃ ជាមួយសាប៊ូ ចឹលសម្លាប់មេរោគ ឬទឹកអាល់កុល ហើយប្រើប្រាស់ម៉ាសអោយបានជាប្រចាំ ជាពិសេសត្រូវអនុវត្តតាមការណែនាំ របស់ក្រសួងសុខាភិបាល។
សម្ដេចក៏បានជូនពរ ប្រជាពលរដ្ឋទាំងអស់ មានសុខភាពល្អចៀសផុត ពីជំងឺឆ្លងកូវីដ-19 ៕
