ភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈ បានសម្រេចអនុញ្ញាតឲ្យ គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ បើកដំណើរការឡើងវិញ នូវរោងជាង បន្ទប់ពិសោធន៍ មជ្ឈមណ្ឌលវាយតម្លៃសមត្ថភាព និងការប្រឡងបញ្ចប់ ការពារសារណា ឬនិក្ខេបបទបញ្ចប់ការសិក្សា បន្ទាប់ពីបានសិក្សាតាមកម្មវិធីសិក្សាពីចម្ងាយ ឬតាមអនឡាញ ។
យោងតាម សេចក្ដីជម្រាបជូន របស់ក្រសួងការងារ នៅថ្ងៃទី១៦ កក្កដានេះ បានឲ្យដឹងថា ការបើកដំណើរការឡើងវិញនេះ គ្រប់គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ ត្រូវអនុវត្តតាមការណែនាំ របស់រាជរដ្ឋាភិបាល និងវិធានការនានារបស់ក្រសួងសុខាភិបាល ពាក់ព័ន្ធនឹងការបង្ការ និងទប់ស្កាត់ការរីករាល ដាលនៃជំងឺកូវីដ១៩ និងវិធានការ ការការងារខាងលើ ណែនាំរបស់ក្រសួង ដូចមានជូនភ្ជាប់ក្នុងឧសម្ព័ន្ធ។
មុននឹងបើកដំណើរការការងារខាងលើ គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ ត្រូវជូនដំណឹងមកក្រសួង (អគ្គនាយកដ្ឋានអប់រំ បណ្តុះបណ្តាលបច្ចេកទេស និងវិជ្ជាជីវៈ) ដើម្បីក្រុមការងារបច្ចេកទេស របស់ក្រសួងចុះ ត្រួតពិនិត្យ តាមដាន និងវាយតម្លៃ៕
