ភ្នំពេញ៖ រដ្ឋាភិបាលបារាំង បានសន្យាជួយបណ្តុះបណ្តាល និងបង្រៀនភាសាបារាំង ដល់កងកម្លាំងមួកខៀវកម្ពុជា និងពង្រឹងកិច្ចសហប្រតិបត្តិការរវាងកងរាជអាវុធហត្ថ នៃកងយោធពលខេមរភូមិន្ទ និងកងរាជអាវុធហត្ថសាធារណរដ្ឋបារាំង ។
កាលពីពេលថ្មីៗកន្លងទៅនេះ ស្ថានទូតបារាំងប្រចាំកម្ពុជា បានឈានដល់ការចុះហត្ថលេខា ជាមួយក្រសួងការពារជាតិកម្ពុជា លើអនុស្សរណៈស្តីពីកិច្ចសហប្រតិបត្តិការ ក្នុងការជួយបណ្តុះបណ្តាល និងបង្រៀនភាសាបារាំងដល់កងកម្លាំងមួកខៀវកម្ពុជា និងកិច្ចសហប្រតិបត្តិការរវាងកងរាជអាវុធហត្ថ នៃកងយោធពលខេមរភូមិន្ទ និងកងរាជអាវុធហត្ថសាធារណរដ្ឋបារាំង។ ពិធីចុះហត្ថលេខានេះ បានធ្វើឡើងដោយមានការ អញ្ជើញចូលរួមរបស់នាយឧត្តមសេនីយ៍ នាង ផាត រដ្ឋលេខាធិការប្រចាំការ ក្រសួងការពារជាតិ និងលោកស្រី អ៊ីវ៉ា ង្វៀនប៊ីន (Eva NGUYEN BINH) ឯកអគ្គរដ្ឋទូតបារាំងប្រចាំកម្ពុជា។
ក្នុងឱកាសនោះនាយឧត្តមសេនីយ៍ នាង ផាត បញ្ជាក់ថា តាមការពិតអនុស្សរណៈ ដែលត្រូវចុះមានចំនួនបី តែយើងចុះលើអនុស្សរណៈចំនួន ២សិន ដែលអនុស្សរណៈទី៣ យើងកំពុងពិចារណា ពិភាក្សាបន្តទៀត ដើម្បីដំណើរការនៅពេលក្រោយ។ លោកនាយឧត្តមសេនីយ៍សង្ឃឹមថា នៅពេលខាងមុខនេះ ចំណងមិត្តភាព សាមគ្គីភាព និងកិច្ចសហប្រតិបត្តិការ រវាងប្រទេសទាំងពីរ និងកងទ័ពទាំងពីរ នឹងត្រូវបានពង្រឹង និងពង្រីកទ្វេឡើងបន្ថែមទៀត។
ជាមួយគ្នានោះលោកស្រីឯកអគ្គរដ្ឋទូតបារាំង បានលើកឡើងថា ការចុះហត្ថលេខាជាមួយគ្នានាពេលនេះ គឺពិតជាមានតម្លៃ និងមានសារៈសំខាន់បំផុត ចំពោះកិច្ចសហប្រតិបត្តិការ រវាងសាធារណរដ្ឋបារាំង និងព្រះរាជាណាចក្រកម្ពុជា។ លោកស្រីបន្ថែមថា ជំងឺកូវីដ-១៩នេះ មានឥទ្ធិពលអាក្រក់សម្រាប់ការបំពេញបេសកកម្មរបស់ កងកម្លាំងមួកខៀវកម្ពុជា រួមនឹងការផ្លាស់ប្តូររបស់ កងទ័ពកម្ពុជានាពេលខាងមុខ ៕
