ភ្នំពេញ៖ អង្គការសង្គ្រោះមេឃពណ៌ខៀវ (Blue Sky Rescue Organization) នឹងបញ្ជូនក្រុមគ្រូពេទ្យស្ម័គ្រចិត្តចំនួន ១៣រូប ដែលមានពិសោធន៍ប្រយុទ្ធនឹងជំងឺកូវីដ១៩ នៅចិន រួមជាមួយបរិក្ខារពេទ្យ និងថ្នាំព្យាបាលជំងឺតម្លៃជាង ១៤ម៉ឺនដុល្លារ តាមរថយន្តពីខេត្តយូណាន ចូលមកកម្ពុជា តាមខេត្តស្ទឹងត្រែង ក្នុងពេលឆាប់ៗខាងមុខនេះ ដើម្បីជួយកម្ពុជាកំចាត់ជំងឺកូវីដ១៩ រយៈពេល ១៥ថ្ងៃ ។ នេះបើតាមការបញ្ជាក់របស់លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសខ្មែរ ។
ក្នុងពិធីប្រគល់ជំនួយ ឧបត្ថម្ភក្រោមក្របលក្ខខ័ណ្ឌអង្គការសង្គមស៊ីវិល សម្រាប់ការពារសុខភាពប្រឆាំងជំងឺកូវីដ ផ្ដល់ដោយមូលនិធិចិនដើម្បីសន្តិភាព និងការអភិវឌ្ឍន៍ នាព្រឹកថ្ងៃទី៣ មេសានេះ លោក ប្រាក់ សុខុន បានថ្លែងអំណរគុណយ៉ាងជ្រាលជ្រៅ ចំពោះនាយកដ្ឋានអន្តរជាតិ នៃគណៈកម្មាធិការកណ្តាលបក្សកុម្មុនិស្តចិន ដែលបានធ្វើការសម្របសម្រួលជាបន្ទាន់ ដើម្បីប្រមូលការគាំទ្រសម្រាប់ជួយកម្ពុជា ក្នុងកិច្ចប្រឹងប្រែងទប់ស្កាត់ និងគ្រប់គ្រងការឆ្លងរីករាលដាលនៃជំងឺកូវីដ១៩ ។ បរិក្ខាពេទ្យដែលជាអំណោយពីមូលនិធិ សម្រាប់សន្តិភាព និងការអភិវឌ្ឍ និងអង្គការសង្គមចិនផ្សេងៗទៀត ដែលរួមមាន ម៉ាស អាវការពារខ្លួន និងថ្នាំបុរាណចិនតម្លៃសរុប ១,១៣លានយ័ន មានសារសំខាន់យ៉ាងខ្លាំងចំពោះកម្ពុជា ខណៈពេលដែលយើង កំពុងត្រូវការសម្ភារៈបរិក្ខាពេទ្យ ដើម្បីប្រយុទ្ធនឹង ការរីករាលដាលនៃជំងឺកូវីដ១៩ ។
លោកបញ្ជាក់ថា កាយវិការសប្បុរសនេះ ឆ្លុះបញ្ចាំងយ៉ាងច្បាប់ពី ចំណងមិត្តភាពរវាងប្រទេស និងប្រជាជនយើងទាំងពីរ ។ ក្នុងអំឡុងពេលនៃការផ្ទុះឡើងនូវ ដ៏សាហាវនេះ នៅប្រទេសកម្ពុជា យើងក៏បានទទួលជំនួយជាច្រើនផងដែរ ពីរដ្ឋាភិបាលចិន ។ ក្រុមអ្នកជំនាញវេជ្ជសាស្ត្រ ៧រូប ត្រូវបានបញ្ជូនពីតំបន់ស្វយ័តក្វាងស៊ី មកដល់ទីក្រុងភ្នំពេញ កាលពីថ្ងៃទី២៣ ខែមីនាកន្លងទៅនេះ រួមជាមួយសម្ភារៈបរិក្ខាសម្រាប់ការពារ និងទប់ស្កាត់ការឆ្លងរាលដាលនៃជំងឺរាតត្បាត ដែលមានតម្លៃជាង ៣លានយ័ន ។ កាលពីថ្ងៃទី១ ខែមេសា កងទ័ពរំដោះប្រជាជនចិន ក៏បានបញ្ជូនបរិក្ខាពេទ្យទម្ងន់ជាង ២ តោនមកជូនកម្ពុជា សម្រាប់ការពារប្រឆាំងនឹងជំងឺកូវីដ១៩ ។ ក្រុមហ៊ុនចិនមួយចំនួន ក៏បានចូលរួមជួយផ្ដល់បរិក្ខារការពារ ដល់ប្រជាជនកម្ពុជាផងដែរ ។
លោកឧបនាយករដ្ឋមន្ត្រី ថ្លែងយ៉ាងដូច្នេះថា «ខ្ញុំក៏បានទទួលពត៌មានដែរថា អង្គការសង្គ្រោះមេឃពណ៌ខៀវ (Blue Sky Rescue Organization) ត្រៀមបញ្ជូនក្រុមគ្រូស្ម័គ្រចិត្តចំនួន ១៣រូប ដែលមានពិសោធន៍ប្រយុទ្ធនឹង នៅចិន រួមជាមួយនិងបរិក្ខារពេទ្យ និងថ្នាំព្យាបាលជំងឺតម្លៃ ១លានយ័ន (ជាង ១៤ម៉ឺនដុល្លារ) ដោយគ្រោងធ្វើដំណើរមកតាមរថយន្តពីខេត្តយូណាន ចូលមកកម្ពុជា តាមខេត្តស្ទឹងត្រែង ក្នុងពេលឆាប់ៗខាងមុខនេះ ដើម្បីជួយកម្ពុជាកំចាត់ជំងឺកូវីដ១៩ រយៈពេល ១៥ថ្ងៃ» ។
លោកឧបនាយករដ្ឋមន្ត្រី បានសម្ដែងការកោតសរសើរ និងអបអរសាទរ យ៉ាងកក់ក្តៅចំពោះប្រទេសចិន ដែលក្រោមការដឹកនាំដ៏រឹងមាំ របស់លោកប្រធានាធិបតី ស៊ី ជិនពីង និងមាគ៌ាដ៏ភ្លឺស្វាងរបស់បក្សកុម្មុនិស្តចិន បានទទួលជោគជ័យដ៏ធំធេង ក្នុងការបញ្ឈប់ការឆ្លងរីករាលដាលនៃជំងឺកូវីដ១៩ នៅទូទាំងប្រទេសចិន ។ ពេលនេះ ចិនបានក្លាយជាប្រទេសឈានមុខ ក្នុងការប្រយុទ្ធប្រឆាំងនឹង ការឆ្លងរាតត្បាតជំងឺកូវីដ១៩ នៅទូទាំងពិភពលោក ដោយបានផ្តល់ជំនួយដល់ប្រទេសចំនួនជាង ៨០។ ប្រទេសចិនច្បាស់ជានឹង ងើបឡើងវិញយ៉ាងរឹងមាំខ្លាំងក្លា ចេញពីវិបត្តិនៃជំងឺរាតត្បាតនេះ ដែលបានធ្វើឲ្យប៉ះពាល់យ៉ាងធ្ងន់ធ្ងរដល់ជីវភាពរស់នៅ និងសកម្មភាពសេដ្ឋកិច្ច នៅជុំវិញពិភពលោក ។
លោកឧបនាយករដ្ឋមន្ត្រី ក៏បានថ្លែងអំណរគុណយ៉ាងជ្រាលជ្រៅ ចំពោះរដ្ឋាភិបាលចិន ដែលតេងតែឈរជាមួយកម្ពុជា ក្នុងគ្រាទុក្ខលំបាក និងបានផ្តល់ជំនួយយ៉ាងច្រើនសន្ធឹកសន្ធាប់ ទ្រទ្រង់ដល់ការអភិវឌ្ឍសេដ្ឋកិច្ច និងវឌ្ឍនភាពសង្គមរបស់ប្រទេសកម្ពុជា ។ ជាពិសេសថ្លែងគុណចំពោះលោក វ៉ាង វិនធាន ឯកអគ្គរដ្ឋទុតចិន និងមន្រ្តីស្ថានទូត ដែលបានប្រឹងប្រែង ដើម្បីលើកកម្ពស់មិត្តភាពជិតស្និទ និង កិច្ចសហប្រតិបត្តិការប្រកបដោយផ្លែផ្កា រវាងប្រជាជាតិយើងទាំងពីរ ហើយព្រមទាំងបានសស្រាក់សស្រាំ ជួយសម្របសម្រួល ការនាំមកនូវជំនួយឧបត្ថម្ភដល់ប្រទេសកម្ពុជា ៕
