ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានណែនាំឲ្យមន្ដ្រី ដែលចុះមូលដ្ឋានទាំងអស់ ត្រូវរៀនសូត្រពីប្រជាជន មិនទៅប្រដៅប្រជាជនក្នុងវេទិកាសាធារណៈឡើយ។ជាពិសេសត្រូវតាំងខ្លួន ជាខ្ញុំបម្រើដ៏ស្មោះត្រង់របស់ប្រជាជន មិនមែនជាចៅហ្វាយនាយរបស់ប្រជាជនឡើយ។
ថ្លែងក្នុងពិធី បញ្ចុះខណ្ឌសីមា និងឆ្លងសមិទ្ធផលនានាក្នុងខេត្តព្រៃវែង នាថ្ងៃទី៩ ខែមីនា ឆ្នាំ២០២០ សម្ដេច ស ខេង បានណែឲ្យមន្ដ្រីគ្រប់ជាន់ថ្នាក់ ត្រូវចុះទៅមូលដ្ឋាន ដើម្បីដឹងសុខទុករបស់ពួកគាត់ ទើបក្រសួងបង្កើត ក្រុមការងារ ចុះជួយមូលដ្ឋាន ធ្វើយ៉ាងណាលើកទឹកចិត្តពលរដ្ឋ ឲ្យចូលរួមវេទិកាសាសាធារណៈ។
សម្ដេច មានប្រសាសន៍ថា «អស់លោក ចុះទៅតាមឃុំ ចុះទៅតាមស្រុកទាំងអស់ ទូទាំងប្រទេស ឥឡូវត្រូវរៀបចំប្រជុំជាមួយប្រជាជន បើកវេទិកាសាធារណៈជាមួយប្រជាជន មិនមែនប្រដៅប្រជាជនទេ ទៅអង្គុយស្ដាប់ប្រជាជន ឲ្យគាត់ប្រដៅយើងវិញ គាត់ឲ្យយោបល់ថា លោកឯងធ្វើនេះខុស រដ្ឋបាលធ្វើនេះមិនទាន់ល្អទេ សូមជួយកែលម្អឡើងវិញ»។
រដ្ឋមន្ដ្រីមហាផ្ទៃ ក៏បានបញ្ជាក់ប្រាប់មន្រ្តី ថ្នាក់ខេត្ត-ស្រុក-ឃុំ ត្រូវមានគោលការណ៍ចុះមូលដ្ឋាន ដើម្បីជួយដោះស្រាយ ពលរដ្ឋ មិនមែនទៅបន្ថែមទុក្ខលំបាកដល់ប្រជាពលរដ្ឋឡើយ៕
