ភ្នំពេញ៖ សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជាបានណែនាំឲ្យភាគីពាក់ព័ន្ធរៀបចំធ្វើវិសោធនកម្មច្បាប់ដើម្បីដកសិទ្ធិអ្នកបើកបរដែលល្មើសច្បាប់ចាប់ពី៣ដងឡើងទៅជាពិសេស អ្នកដែលបើកបរល្មើសច្បាប់លើកទី១ ផាកពិន័យ១ដង ល្មើសលើកទី២ត្រូវផាកពិន័យគុណនឹង២ បើល្មើសលើកទី៣ត្រូវផាកពិន័យគុណនឹង៣ដងដែរ។
ក្នុងពិធីបិទសន្និបាត បូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២០ របស់ក្រសួងមហាផ្ទៃ នៅថ្ងៃទី២០ ខែកុម្ភៈ ឆ្នាំ២០២០សម្ដេចតេជោ ហ៊ុន សែន បានថ្លែងថា”ខ្ញុំស្នើឲ្យយកចិត្តទុកដាក់នូវវិធានការទាំងឡាយដែលយើងត្រូវប្រកាន់យកនៅពេលខាងមុខទៅលើការពង្រឹង ការអនុវត្តច្បាប់ ដោយរាប់ទាំងវិធានការនានា ដែលដាក់ចេញសម្រាប់ដំណើរការទៅមុខ កែវិសោធកម្មច្បាប់បានក៏ធ្វើទៅវិសោធកម្មធ្វើអ្វីបានគឺធ្វើ។
ឧទាហរណ៍ថាផាកលើកទីមួយ ៤០ម៉ឺនរៀលកិប១ ផាកលើកទី២ឃើញទៅបំពានមួយកន្លែងទៀត គេឃើញកិបលើកទី២ផាកដល់ទៅ៨០ម៉ឺន លើកទីបី ផាកឌុប បានសេចក្ដីថា ពី៨០ម៉ឺនទៅ១៦០ម៉ឺន(១លាន៦សែនរៀល)លើកទី៣ គឺបានសេចក្ដីថា ដល់ឱកាសដកសិទ្ធិ ដកសិទ្ធិ មិនឲ្យបើកបរថា ១ឆ្នាំឬ២ឆ្នាំអត់ឲ្យអ្នកឯងបើកបរតទៅទៀតទេ ដល់ទៅគ្រប់២ឆ្នាំឬគ្រប់១ឆ្នាំ ចាំយើងឲ្យសិទ្ធិបើកបរឡើងវិញ”៕
