ភ្នំពេញ៖ បុរសជាមន្ត្រីយោធាម្នាក់ ដែលបាញ់រះចំនួន ៦គ្រាប់ នៅហាងម៉ាស្សាមួយកន្លែង យីហោ លីលី ស្ថិតក្នុងភូមិចំការឪឡឹកទី១ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ កាលពីយប់ថ្ងៃទី៣១ ខែមករា ឆ្នាំ២០២០ ក្រោយពីរូបគេចូលម៉ាស្សា និងរួមភេទអត់ឲ្យលុយខាងស្រីត្រឹមតែ ២៥ដុល្លារនោះ ត្រូវកម្លាំងកងរាជអាវុធហត្ថខណ្ឌពោធិ៍សែនជ័យ សហការជាមួយកម្លាំងអាវុធហត្ថ រាជធានីភ្នំពេញតាមចាប់ខ្លួនបានហើយ នៅស្រុកស្រែអំបិល ខេត្តកោះកុង កាលពីវេលាម៉ោង៤ ល្ងាច ថ្ងៃទី៦ ខែកុម្ភៈ ឆ្នាំ២០២០ ។
តាមប្រភពព័ត៌មានពី កម្លាំងអាវុធហត្ថខណ្ឌពោធិ៍សែនជ័យបានឲ្យដឹងថា ក្រោយពីខ្មាន់កាំភ្លើងជាមន្ត្រីយោធាម្នាក់ បានបាញ់រះចំនួន ៦គ្រាប់ នៅហាងម៉ាស្សាមួយកន្លែងយីហោ លីលី ភូមិចំការឪឡឹក សង្កាត់កាកាបទី២ ហើយព្យាយាមគេចខ្លួនបាត់ ។ បន្ទាប់មកកម្លាំងក៏បានចុះទៅដល់ ចំណុចកើតហេតុសួរនាំ ដើម្បីកំណត់មុខសញ្ញា និងងាយស្រួលតាមចាប់ ខ្មាន់កាំភ្លើងយកមកដាក់ទោសតាមច្បាប់ ។
រហូតមកដល់វេលាម៉ោង ៤ល្ងាចថ្ងៃទី៦ ខែកុម្ភៈ ឆ្នាំ២០២០ កម្លាំងអាវុធហត្ថខណ្ឌពោធិ៍សែនជ័យ បានសហការជាមួយកម្លាំង អាវុធហត្ថរាជធានី បានធ្វើការស្រាវជ្រាវរហូត ឈានទៅដល់ការឃាត់ខ្លួនជនសង្ស័យ បាននៅស្រុកស្រែអំបិល ខេត្តកោះកុង ។ ក្រោយឃាត់ខ្លួនជនសង្ស័យ ត្រូវបានកម្លាំងអាវុធហត្ថរាជធានី យកទៅសួរនាំរង់ចាំចាត់ការតាមច្បាប់ ៕
