ភ្នំពេញ៖ ក្រសួងសុខាភិបាល បានដាក់ម៉ាស៊ីនស្កេនកម្ដៅ នៅតាមអាកាសយានដ្ឋានអន្តរជាតិភ្នំពេញ ខេត្តព្រះសីហនុ សៀមរាប និងតាមច្រកព្រំដែនអន្តរជាតិ បាវិត ប៉ោយប៉ែត និងព្រែកចាក ដើម្បីតាមដាន និងបង្ការការឆ្លងកូរ៉ូណាវីរុសថ្មីស្របពេលវីរុសថ្មីនេះ កំពុងរាតត្បាតនៅប្រទេសចិន និងបណ្ដាប្រទេសមួយចំនួន។
លោកស្រី ឱ វណ្ណឌីន អ្នកនាំពាក្យក្រសួងសុខាភិបានបានផ្ញើសារប្រាប់ប្រធានមន្ទីរសុខាភិបាលរាជធានីខេត្តកាលពីពេលថ្មីៗនេះថា”ការដាក់ម៉ាស៊ីនស្កេនកម្ដៅនេះ គឺដើម្បីស្វែងជនសង្ស័យណាម្នាក់ ដែលមានបញ្ហាសុខភាពឬកម្ពៅខ្ពស់ សម្រាក់បង្ការនិងពិនិត្យស្វែងរកឲ្យអន្តសញ្ញាតនៃវីរុសថ្មីរលាកសួតនេះ។ ហើយមកដល់ពេលរសៀលនេះ មិនទាន់រកឃើញជនសង្ស័យណាម្នាក់ផ្ទុកជំងឺនេះឡើយ”។
ក្រៅពីដាក់ម៉ាស៊ីនស្កេនកម្ដៅ ជនឆ្លងដែននៅតាមអាកាសយានដ្ឋាន និងច្រកចេញចូលព្រំដែន ក្រសួងសុខាភិបាល ក៏បានត្រៀមក្រុមជំនាញជាង ២,០០០នាក់ ដើម្បីពិនិត្យ ព្យាបាល ព្រមទាំងត្រៀមកន្លែងសម្រាកព្យាបាលដាច់ដោយឡែក និងត្រៀមកន្លែងពិសោធន៍ ដើម្បីស្វែងរកអត្តសញ្ញាណវីរុសថ្មីនេះដែរ។
ក្រសួងសុខាភិបាលឲ្យដឹងថា ជំងឺនេះ បានធ្វើមនុស្សស្លាប់៩នាក់ ប្រទេសចិនខណៈបណ្ដាប្រទេសនានាកំពុងសម្ដែងការព្រួយបារម្ភយ៉ាងខ្លាំង៕
