ភ្នំពេញ៖ រដ្ឋលេខាធិការក្រសួងបរិស្ថានលោកនេត្រ ភក្រ្តាបានអះអាងថាដោយស្ថានភាពពិបាកក្នុងការដឹកជញ្ជូន ក្រុមការងារពិបាក នឹងយកសពកូនដំរីមករក្សាទុកក៏បានសម្រេចអូសសាកសពកូនដំរី មកកប់នៅដីក្បែរមាត់ អូរសិនដើម្បីទុកឱ្យរលួយសាច់ ទើបអាច ប្រមូលឆ្អឹងមកធ្វើជារូបសំណាក់ជាក្រោយ។
លោក នេត្រ ភក្ត្រា រដ្ឋលេខាធិការនិងជាមន្ត្រី នាំពាក្យក្រសួងបរិស្ថាន នៅថ្ងៃទី១៧ ខែមករា ឆ្នាំ២០២០បានបញ្ជាក់ថាកូនដំរីព្រៃមួយក្បាលត្រូវបានប្រទះឃើញស្លាប់នៅ ក្នុងអូរលាវព្រំប្រទល់រវាងខេត្តរតនៈគិរី និង
ខេត្តមណ្ឌលគិរីកាលពីថ្ងៃទី១៥ ខែមករា ឆ្នាំ២០២០ ដោយ មានសភាពស្អុយរលួយ។រហូតមកទល់នឹងពេលនេះមិនទាន់ដឹងអំពីមូលដ្ឋានពិត ប្រាកដនៃការស្លាប់របស់កូនដំរីព្រៃនេះនៅឡើយទេ ប៉ុន្តែតាមការ សន្និដ្ឋានជំហានដំបូងកូនដំរីព្រៃនេះ អាចស្លាប់ដោយការលង់ទឹក។
លោករដ្ឋលេខាធិការក្រសួងបរិ ស្ថានបានឱ្យដឹងថា៖ «តាមការពិនិត្យ សាកសពសត្វដំរីនេះ មិនមានស្លាកស្នាមរបួសអ្វីគួរឱ្យកត់សម្គាល់ ដែលអាចសន្និដ្ឋានថា អាចស្លាប់ ដោយមូលហេតុអ្វីផ្សេងឡើយ អ្វីដែលកត់សម្គាល់គឺជើងក្រោយរបស់ កូនដំរីនេះបាក់ ដែលសង្ស័យថា អាចត្រូវបានគៀបនឹងល្បាក់ថ្ម ព្រោះអូរលាវមានអន្លង់ជ្រៅៗ និងមាន ល្បាក់ថ្ម ច្រើន»។
លោករដ្ឋលេខាធិការក្រសួងបរិស្ថានបានឱ្យដឹងថា ពេលទទួលបានដំណឹងពីប្រជានេសាទ
ថាមានសត្វដំរីស្លាប់ មន្រ្តីឧទ្យានុរក្សនៃឧទ្យានជាតិអូរយ៉ាដាវ ចំនួន ៣ នាក់បានចុះទៅពិនិត្យផ្ទាល់នៅ លើទីតាំង និងបានរកឃើញថាមានកូនដំរីព្រៃ ១ក្បាលបានស្លាប់ក្នុងទឹក។ តាមការសាកសួរពីអ្នកភូមិ បានឱ្យដឹងថា ប្រហែលជាង ១០ ថ្ងៃមុន ប្រជាពលរដ្ឋបានឃើញហ្វូងដំរីប្រមាណពី ២០ ទៅ ៣០ ក្បាល បានហែលឆ្លងអូរលាវចូលមករកចំណី នៅក្នុងឧទ្យានជាតិអូរយ៉ាដាវ ដោយធ្វើការកាច់បំបាក់ ដើមឬស្សីនិងមែកឈើ ហើយបានបន្សល់លាមកជាច្រើន ហើយបន្ទាប់មកក៏បានឆ្លងទៅទឹកដីខេត្ត មណ្ឌលគិរីវិញ។ ក្រោយមកក៏បានប្រទះឃើញកូនដំរីស្លាប់ក្នុងទឹក។
លោក នេត្រ ភក្ត្រា បានថ្លែងថា ពិតជាគួរឱ្យសោកស្តាយចំពោះការបាត់បង់កូនដំរីព្រៃមួយនេះ៕
