ភ្នំពេញ៖ ក្រសួងធនធានទឹក និងឧតុនិយម នៅថ្ងៃទី១៤ ខែមករា ឆ្នាំ២០២០នេះ បានចេញសេចក្តីជូនដំណឹង ស្តីពីស្ថានភាពធាតុអាកាសនៅកម្ពុជា ដោយអះអាងថាចាប់ពីថ្ងៃទី១៥-១៧ខែមករា ខេត្តចំនួន៥ របស់កម្ពុជានឹងចុះត្រជាក់ដល់១៧អង្សាសេ។
ក្រសួងបានបញ្ជាក់ថា តាមរយៈការតាមដានស្ថានភាពអាកាសធាតុជាប់ជាបន្ត សង្កេតឃើញថា ជ្រលងសម្ពាធខ្ពស់នឹងរំកិលចុះមកក្រោម ជាមួយនឹងខ្យល់មូសុងឦសាន មានឥទ្ធិពលបង្គួរលើកម្ពុជា។
ស្ថានភាពបែបនេះ ធ្វើឲ្យ៖
១៖ ចាប់ពីថ្ងៃទី១៥-១៧ ខែមករា៖ បណ្តាខេត្តនៅតំបន់ជួរភ្នំដងរែក និងខ្ពង់រាបឦសាន មានខេត្តឧត្តរមានជ័យ ព្រះវិហារ រតនគិរី មណ្ឌលគីរី និងប៉ៃលិន មានធាតុអាកាសនឹងចុះត្រជាក់នៅពេលព្រឹក ដោយ៖
* សីតុណ្ហភាពអប្បបរមា មានពី១៧-២០អង្សាសេ
* សីតុណ្ហភាពអតិបរមា មានពី២៩-៣២អង្សាសេ
២៖ តំបន់វាលទំនាបកណ្តាល
* សីតុណ្ហភាពអប្បបរមា មានពី២០-២២អង្សាសេ
* សីតុណ្ហភាពអតិបរមា មានពី៣០-៣២អង្សាសេ
៣៖ តំបន់មាត់សមុទ្រ
* សីតុណ្ហភាពអប្បបរមា មានពី២៣-២៥អង្សាសេ
* សីតុណ្ហភាពអតិបរមា មានពី៣១-៣៣អង្សាសេ
