ភ្នំពេញ៖ កម្លាំងជំនាញផែននគរបាលព្រហ្មទណ្ឌ បានចេញល្បាតនៅចំណុចតាមបណ្តោយផ្លូវអូរ២ ស្ថិតនៅភូមិ៥ សង្កាត់៤ ក្រុង-ខេត្តព្រះសីហនុ ក៏ប្រទេះឃើញរថយន្ត១គ្រឿងម៉ាក TAKOMA ពណ៌ទឹកប៉ិច បើកបរដោយជនជាតិចិន ហើយរថយន្តនោះបានយកថង់ពណ៌ខ្មៅបិទបាំងផ្លាកលេខ។ ឃើញដូចនេះកម្លាំងល្បាតមានការសង្ស័យថាជាមុខសញ្ញាក្រុមប្លន់ និងចាប់ជំរិតប្រដាប់អាវុធ ក៏បានបើកម៉ូតូតាមឃ្លាំមើលដោយជនសង្ស័យដឹងខ្លួនក៏បើករថយន្តបង្វែងដានរត់គេចខ្លួនឡើងទៅផ្លូវជាតិ៤។
កម្លាំងសមត្ថកិច្ចបានសហការជាមួយ កម្លាំងអធិការដ្ឋាននគរបាលស្រុកព្រៃនប់ ដេញតាម និងស្ទាក់ចាប់ខ្លួនជនសង្ស័យ ពេលដល់ចំណុចហួសស្ពានទឹកសាប ស្ថិតក្នុងឃុំរាម ស្រុកព្រៃនប់ ជនសង្ស័យបានបត់រថយន្តចូលផ្លូវលំមួយដើម្បីគេចពីកម្លាំងសមត្ថកិច្ច តែដោយល្បឿនរថយន្តលឿនពេក ក៏ធ្វើអោយរថយន្តក្រឡាប់ ហើយជនសង្ស័យបានព្យាយាមលូនចេញពីរថយន្តដើម្បីរត់គេចខ្លួន តែត្រូវបានកម្លាំងសមត្ថកិច្ចចាប់ឃាត់ខ្លួនបាន ១នាក់។
ដកហូតបានវត្ថុតាង៖កាំភ្លើងខ្លី១ដើម រីឯជនសង្ស័យ ២នាក់ទៀត បានរត់គេចខ្លួនចូលក្នុងព្រៃបាត់ កម្លាំងសមត្ថកិច្ចយើងកំពុងធ្វើការស្វែងរក។
ជនសង្ស័យឈ្មោះ WANG HONG TAO ភេទប្រុស អាយុ ២៩ឆ្នាំ ជនជាតិចិន មុខរបរ អ្នកនាំភ្ញៀវលេងល្បែង ស្នាក់នៅ ភូមិ១ សង្កាត់៣ ក្រុង-ខេត្តព្រះសីហនុ ។
វត្ថុតាងចាប់យកបាន៖ កាំភ្លើងខ្លី១ដើម ម៉ាក ZORAKI ពណ៌ខ្មៅ មានលេខសម្គាល់ 000232,បង់កាំភ្លើង១ មានគ្រាប់ប្រភេទ៣៨០ ចំនួន៥គ្រាប់, រថយន្ត១គ្រឿង ម៉ាក TAKOMA ពណ៌ ទឹកប៉ិច ពាក់ផ្លាកលេខៈ ភ្នំពេញ 2BD-7915 ។ចំពោះករណីនេះ កម្លាំងជំនាញការិយាល័យនគរបាលព្រហ្មទណ្ឌកម្រិតស្រាល កំពុងបន្តនីតិវិធី៕
