ភ្នំពេញ៖ លោក គួច ចំរើន អភិបាលខេត្តព្រះសីហនុ បានលើកឡើងក្នុងយុទ្ធនាការចុះប្រមូលសំរាមនិងសម្អាតបរិស្ថាននៅក្នុងក្រុងព្រះសីហនុថាសំរាមមិនមែនករណីគួរឲ្យស្អប់ខ្ពើមទេតែអ្នកចោលសំរាមផ្តេសផ្តាសជារឿងដែលមិនល្អខណៈបញ្ហាសំរាមកំពុងរីកធំហួសពីសមត្ថភាពក្រុមហ៊ុនដឹកជញ្ជូនចេញប៉ុន្តែរូបលោកនិងទាំងមន្ត្រីពាក់ព័ន្ធនឹងបន្តការខិតខំគ្រប់គ្រងសំរាមឲ្យបានច្បាស់លាស់ ដើម្បីរៀបចំផែនការឲ្យបានគត់មុតក្នុងការដឹកជញ្ជូនចេញបានទាន់។
លោក គួច ចំរើន បានសរសេរក្នុងបណ្ដាញទំនាក់ទំនងសង្គមហ្វេសប៊ុកផ្ទាល់ខ្លួននៅព្រឹកថ្ងៃទី១៣កក្កដានេះថា”សំរាមមិនមែនករណីគួរអោយស្អប់ខ្ពើមទេ តែអ្នកចោលសំរាមផ្តេសផ្តាសជារឿងដែរមិនល្អ។ថ្ងៃនេះយើងជួបជុំគ្នា គោលដៅយើងគឺប្រមូលសំរាមចេញ ប៉ុន្តែអ្វីដែលសំខាន់ជាងនេះទៅទៀតពាក់ពន្ធ័នឹងសំរាមសេសសល់នេះ សុំអោយអ្នកប្រើប្រាស់សម្រាមទាំងអស់ត្រូវមានការយល់ដឹងអោយបានច្បាស់អំពីសំរាម។ ទោះបីជាមានយុទ្ធនាការប្រមូលសំរាមចេញពីក្រុងព្រះសីហនុថ្ងៃនេះប្រាកដណាស់ថាការគ្រប់គ្រងសំរាមមិនទាន់បានល្អនៅឡើយទេ តែយើងចាប់ផ្តើមយល់ដឹងអំពីសំរាមពីពេលនេះតទៅ”។ លោកអភិបាលខេត្តបញ្ជាក់បន្ថែមថា”បញ្ហាសំរាមកំពុងរីកធំហួសពីសមត្ថភាពក្រុមហ៊ុនដឹកជញ្ជូនចេញ តែយ៉ាងណាក៏ដោយយើងខ្ញុំរួមទាំងមន្ត្រីពាក់ព័ន្ធនឹងបន្តការខិតខំគ្រប់គ្រងសំរាមនេះអោយបានច្បាស់លាស់ ដើម្បីរៀបចំផែនការអោយបានគត់មុតក្នុងការដឹកជញ្ជូនចេញអោយបានទាន់ អោយបានគ្រប់ចំនួននឹងបរិមាណដែលបានបញ្ជូនចេញតែក៏សុំអោយមានកិច្ចសហការគ្នាចូលរួមពីគ្រប់មជ្ឈដ្ឋានទាំងអស់ ក្នុងវេចខ្ជប់ ទុកដាក់សំរាមអោយបានត្រឹមត្រូវ”។
លោក គួច ចំរើន បន្តថា”បន្ទាប់ពីការជួបជុំ និងការប្រមូលសម្រាមនេះទៅ ខ្ញុំក៏សុំស្នើសុំអ្នកស្ម័គ្រទាំងអស់ចូលរួមនៅទីនេះបានរួមគ្នាបន្តការអប់រំផ្សព្វផ្សាយអោយបានទូលំទូលាយទៅកាន់បងប្អូន ប្រជាពលរដ្ឋអ្នកបង្កើតសំរាមនៅទូទាំងក្រុងព្រះសីហនុយើង និងសូមអោយបងប្អូនអ្នកស្ម័គ្រចិត្តទាំងអស់នៅទីនេះ ធ្វើខ្លួនអោយក្លាយទៅជាចលករសំខាន់នៃអ្នកគ្រប់គ្រងសំរាមនៅទីក្រុងព្រះសីហនុរបស់យើងដោយខិតខំផ្សព្វផ្សាយអោយទូលំទូលាយទៅកាន់អ្នកបង្កើតសម្រាមអោយពួកគាត់មានការយល់ដឹង ចូលរួម ដើម្បីយើងមានលទ្ធភាពគ្រប់គ្រងសំរាមអោយបានល្អ យើងមានលទ្ធភាពថែទាំអនាម័យ បរិស្ថាននៅក្រុងព្រះសីហនុអោយបានល្អចាប់ពីថ្ងៃនេះតទៅ”៕
