លោក ប៉ាន សូរស័ក្តិ ជំរុញអាមេរិកឲ្យវិនិយោគលើការកែច្នៃកសិផល ដើម្បីផ្គត់ផ្គង់ទីផ្សារក្នុងស្រុក
ភ្នំពេញ ៖ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានជំរុញប្រតិភូធុរជន មកពីតំបន់កំពង់ផែឡូសអែនជឺលេស សហរដ្ឋអាមេរិក ធ្វើការវិនិយោគកែច្នៃ និងអភិវឌ្ឍន៍ខ្សែសង្វាក់តម្លៃកសិផលខ្មែរ ទៅជាផលិតផលម្ហូបអាហារ និងទំនិញប្រើប្រាស់ផ្សេងៗ ដើម្បីផ្គត់ផ្គង់តម្រូវការក្នុងស្រុក និងនាំចេញទៅកាន់ទីផ្សារអន្តរជាតិ។ នេះបើយោងតាមគេហទំព័រហ្វេសប៊ុករបស់ ក្រសួងពាណិជ្ជកម្ម។
ក្នុងជំនួបពិភាក្សាការងារជាមួយ លោក ណ័រមេន អារីកាវ៉ា (Norman Arikawa) ជំនួយការនាយកផ្នែកអភិវឌ្ឍន៍ពាណិជ្ជកម្ម ប្រចាំតំបន់កំពង់ផែឡូសអែនជឺលេស កាលពីថ្ងៃទី២៤ ខែមករា ឆ្នាំ២០១៩ រដ្ឋមន្ត្រីពាណិជ្ជកម្ម ពន្យល់ពីសក្តានុពលនៃវិស័យកសិកម្ម និងកម្មន្តសាល ដែលវិនិយោគិនបរទេស អាចទាញយកប្រាក់ចំណេញខ្ពស់ ពីការកែច្នៃវត្ថុធាតុដើម ទៅជាទំនិញប្រើប្រាស់ និងនាំចេញទៅកាន់ប្រទេសទីបី។
លោក ប៉ាន សូរស័ក្តិ មានប្រសាសន៍ថា “កម្ពុជា សម្បូរទៅដោយភោគផលជាច្រើនដូចជា ស្រូវ និងដំឡូងមី ប៉ុន្តែយើងត្រូវការវិនិយោគិន ជួយកែច្នៃកសិផលទាំងនេះ ទៅជាទំនិញប្រើប្រាស់ និងផលិតផលសម្រេច ហើយលោកអ្នកក៏អាចដាក់ទុនផលិតសម្លៀកបំពាក់ និងកាបូបដាក់សម្ភារៈធ្វើដំណើរដើម្បីនាំចេញទៅកាន់ទីផ្សារសហរដ្ឋអាមេរិកផងដែរ”។
បន្ថែមពីនេះ លោកលើកឡើង ពីកិច្ចប្រឹងប្រែងរបស់រាជរដ្ឋាភិបាល ក្នុងការទាក់ទាញវិនិយោគិន តាមរយៈការអនុវត្តកម្មវិធីកំណែទម្រង់ស៊ីជម្រៅ ការដាក់ចេញនូវគោលនយោបាយវិនិយោគ និងបើកចំហរល្អជាងគេនៅក្នុងតំបន់ រួមជាមួយការបន្តកសាងហេដ្ឋារចនាសម្ព័ន្ធថ្មីៗ ដូចជាព្រលានយន្តហោះ កំពង់ផែអន្តរជាតិ តំបន់សេដ្ឋកិច្ចពិសេស ផ្លូវល្បឿនលឿន និងផ្លូវដែក ដើម្បីជំរុញកិច្ចសម្រួលពាណិជ្ជកម្ម និងលើកកម្ពស់វិស័យទេសចរណ៍ ជាដើម។
ជាការឆ្លើយតប លោក ណ័រមេន អារីកាវ៉ា បានសម្តែងក្តីរំភើបចំពោះវឌ្ឍនភាព និងកំណើនសេដ្ឋកិច្ចរបស់កម្ពុជា។លោក អំណរគុណ រដ្ឋមន្ត្រីពាណិជ្ជកម្ម ដែលបានពន្យល់ពីគោលនយោបាយរបស់រដ្ឋាភិបាល និងចែករំលែកនូវព័ត៌មានល្អៗទាក់ទិននឹងឱកាសវិនិយោគលើវិស័យសំខាន់ៗនៅកម្ពុជា។
លោកប្រធានប្រតិភូរូបនេះ ក៏បានសន្យាជួយផ្សព្វផ្សាយអំពីសក្តានុពលរបស់កម្ពុជា ទៅកាន់តំបន់កំពង់ផែឡូសអែនជឺលេស ដើម្បីកៀងគរធុរជនអាមេរិក ឲ្យចូលមកបណ្តាក់ទុនកាន់តែច្រើនកម្ពុជា សំដៅចូលរួមអភិវឌ្ឍន៍កំណើនសេដ្ឋកិច្ច និងកាត់បន្ថយភាពក្រីក្រ ជាមួយរាជរដ្ឋាភិបាលកម្ពុជា៕
