ភ្នំពេញ៖ ក្នុងជំនួបសំណេះសំណាលជាមួយនិស្សិតខ្មែរចំនួន ៤៦៨នាក់ ដែលកំពុងសិក្សានៅទីក្រុងប៉េកាំង ប្រទេសចិន កាលពីថ្ងៃទី ២០ ខែ មករាសម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជាបានបង្ហាញមហិច្ឆតាធ្វើយ៉ាងណាក្នុងឆ្នាំ២០១៩នេះត្រូវស្រូបយកទេសចរចិនយ៉ាងហោចណាស់ ០.០៥% នៃចំនួនប្រជាជនចិន សរុប១,៣០០ លាននាក់ខណៈសព្វថ្ងៃទំហំពាណិជ្ជកម្មកម្ពុជា-ចិនបានកើនឡើងដល់ ៥,៦០០លានដុល្លារ។
យោងតាមគេហទំព័រហ្វេសប៊ុករបស់សម្ដេចនាយករដ្ឋមន្រ្តី បានឲ្យដឹងបន្ថែមថា នៅក្នុងឆ្នាំ ២០១៧ កម្ពុជាទទួលបានទេសចរចិនប្រមាណ ១.២ លាននាក់ ហើយនៅឆ្នាំ ២០១៨ កន្លងទៅនេះ ទេសចរចិនបានកើនឡើងដល់ ១.៩លាននាក់។ កាលពីឆ្នាំមុន សម្តេចតេជោ គ្រោងចង់បានទេសចរចិនប្រមាណ ០.០១% តែចាប់ពីឆ្នាំ ២០១៩ នេះ គឺកម្ពុជាចង់បានទេសចរចិនយ៉ាងហោចណាស់ ០.០៥% នៃចំនួនប្រជាជនចិន ១,៣០០ លាននាក់។
ជាមួយគ្នានេះដែរ គឺកម្ពុជាត្រូវខិតខំបើក ពង្រីក និងពង្រឹងទីផ្សារអោយបានច្រើនថែមទៀតក្រៅពីទីផ្សាអាមេរិក និងអ៊ឺរ៉ុប ដើម្បីបញ្ចេញទំនិញ និងផលិតផលកសិកម្មកម្ពុជាចេញក្រៅ ដូចជានៅក្នុងប្រទេសចិន, អាហ្វ្រិក, មឈ្ឈឹមបូព៌ា និងកូរ៉េជាដើម។ សព្វថ្ងៃនេះ ទំហំពាណិជ្ជកម្មកម្ពុជានិងចិនក៏បានកើនឡើងដល់ ៥,៦០០លានដុល្លារហើយ។ មិត្តចិនគឺវិនិយោគធំជាងគេនៅកម្ពុជាជាពិសេសលើវិស័យហេដ្ឋារចនាសម្ព័ន្ឋផ្លូវថ្នល់ ស្ពាន ស្ពានអាកាស និងវារីអគ្គីសនី ជាដើម៕
