ភ្នំពេញ៖លោក កត បូរ៉ានប្រធានមន្ទីរបរិស្ថានខេត្តបាត់ដំបងកាលពីថ្ងៃទី១៨ខែធ្នូឆ្នាំ២០១៨បានឱ្យដឹងថាមានវត្តមានខ្លាឃ្មុំជាច្រើននៅក្នុងតំបន់ការពារធម្មជាតិក្នុងខេត្តបាត់ដំបងហើយសត្វខ្លាដែលចេញពីព្រៃមកខាំសត្វគោនៅសំឡូតជាប្រភេទសត្វខ្លាឃ្មុំធំ។ លោកបានអះអាងបែបនេះ ខណៈពេលសមត្ថកិច្ច បានឃើញ ដានជើងនៅលើដី និងរោមខ្លាឃ្មុំធំជាប់នឹងស្នាមរបួស ដែលវាចេញពីព្រៃមកខាំសត្វគោមួយក្បាល របស់ម្ចាស់ឈ្មោះ ស៊ុន ភាព ដែលជាប្រជាជនរស់នៅភូមិស្ទឹងតូច ឃុំកំពុងល្ពៅ នៅស្រុកសំឡូត ខេត្តបាត់ដំបង។
លោក កត បូរ៉ាន បានបញ្ជាក់បន្ថែមថា នេះពិតជាមានវត្តមាននៃសត្វខ្លាឃ្មុំពិតប្រាកដ ព្រោះបើពិនិត្យឃើញ មានរោម និងស្នាមក្រចកជាប់នឹងរបួសត្វគោដោយឡែករបៀបវាយប្រហារចំណីអាហារគឺវាខាំបំពង់កក្រោម និងខ្ទប់ច្រមុះ។
លោក កត បូរ៉ាន បានឱ្យដឹងដែរថា ក្នុងតំបន់ប្រើប្រាស់ច្រើនយ៉ាងសំឡូត ដែលស្ថិតនៅក្នុងស្រុកសំឡូត ខេត្តបាត់ដំបង ជាជម្រករស់នៅនៃហ្វូងខ្លាឃ្មុំព្រៃ ដែលខ្លះមានទំងន់ចាប់ពី១៤០គីឡូក្រាម។
លោកប្រធានមន្ទីរបរិស្ថានខេត្តបាត់ដំបងបញ្ជាក់ដែរថាបន្ទាប់ពីមានការការពារនិងអភិរក្សធនធានធម្មជាតិ បានល្អប្រសើរនៅតាមតំបន់ការពារធម្មជាតិ រយៈពេល១០កន្លងមកនេះ ជាពិសេសនៅក្នុងខេត្តបាត់ដំបង វត្តមានសត្វព្រៃមានចំនួនកើនឡើងច្រើន។ បើតាមរយៈការអង្កេតចាប់បានពីកាមេរ៉ា នៅតំបន់ការពារធម្មជាតិ ថនិកសត្វធំៗជាច្រើនបានបង្ហាញខ្លួន ជាពិសេសចំនួនសត្វខ្លាឃ្មុំ និងខ្លារខិន។
សូមបញ្ជាក់ថា បច្ចុប្បន្ននេះ ក្រសួងបរិស្ថានបានបង្កើត និងគ្រប់គ្រងតំបន់ការពារធម្មជាតិ ចំនួន៥១កន្លែង ប្រកបដោយប្រសិទ្ឋភាព និងល្អប្រសើរ លើផ្ទៃដីប្រមាណ៧,៥លានហិកតា៕
