នៅសល់តែប៉ុន្មានថ្ងៃទៀតប៉ុណ្ណោះ ពិធីបុណ្យចូលឆ្នាំថ្មីប្រពៃណីជាតិខ្មែរ នឹងចូលមកដល់ ហើយយើងសង្កេតឃើញថានៅតាមបណ្ដារាជធានី ខេត្តបានរៀបចំតុបតែង លម្អនៅតាមដងផ្លូវ សួនច្បារ ដងស្ទឹង ដោយមានបំពាក់អំពូលភ្លើងចម្រុះពណ៌ អមដោយទង់ជាតិ ទង់សាសនា ទង់ជ្វាលា ផ្កា និងរូបសត្វពស់តំណាងឱ្យទេវតាឆ្នាំម្សាញ់ យ៉ាងស្រស់ស្អាត ដើម្បីទទួលទេវតាឆ្នាំថ្មី ក៏ដូចជាទាក់ទាញភ្ញៀវទេសចរជាតិ និងអន្តរជាតិ ដែលធ្វើដំណើរទៅកម្សាន្តនៅតាមតំបន់វប្បធម៌ តំបន់ឆ្នេរ តំបន់អេកូទេសចរណ៍ និងតំបន់ផ្សេងៗទៀត ប្រកបដោយភាពសប្បាយរីករាយអំណរឆ្នាំថ្មី ក្រោមម្លប់នៃសុខសន្តិភាព។
ពិធីបុណ្យចូលឆ្នាំថ្មីប្រពៃណីជាតិខ្មែរ គឺជាពិធីបុណ្យប្រពៃណីមួយដែលបណ្ដុះស្មារតីស្រលាញ់រាប់អានគ្នារវាងអ្នកស្រុកព្រៀងលាន ជាកត្ដាបង្កើតសាមគ្គីភាពជាតិ។ ហេតុនេះហើយទើបនៅពេលនោះគេមិនត្រឹមតែជួបជុំគ្នាក្នុងគ្រួសារប៉ុណ្ណោះទេ តែគេនាំគ្នាទៅធ្វើបុណ្យនៅវត្ដអារាមទៀត ដែលជាមជ្ឈមណ្ឌលបង្កើតសាមគ្គីភាព។ ដោយសារពិធីបុណ្យចូលឆ្នាំថ្មី មានអត្ថន័យធំធេងយ៉ាងនេះហើយទើបខែ្មរយើងរក្សាកេរដំណែល និងប្រារព្ធពិធីបុណ្យនេះទុកជាប្រពៃណីជាតិមួយតាំងពីដើមរហូតមក។
លោក ស្រី សុភ័ក អភិបាលរងខេត្តកំពង់ចាម បានមានប្រសាសន៍ថា ខេត្តកំពង់ចាមនឹងរៀបចំព្រឹត្តិការណ៍សង្ក្រាន្តទ្រង់ទ្រាយធំជាងមុនរយៈពេលបីថ្ងៃគឺនៅថ្ងៃទី១៤ ១៥ និង១៦ ខែមេសា ឆ្នាំ២០២៥ ខាងមុខនេះដោយរដ្ឋបាលខេត្តបានចាប់ដៃគូជាមួយវិស័យឯកជនក្នុងការរៀបចំកម្មវិធីដើម្បីធ្វើយ៉ាងណាឱ្យព្រឹត្តិការណ៍នេះកាន់តែល្អ និងមានមនុស្សមកលេងកាន់តែច្រើន ។
លោកអភិបាលរងខេត្ត បានបន្ថែមថា កម្មវិធីសង្ក្រាន្តនៅក្រុងកំពង់ចាម នឹងមានទិដ្ឋភាពល្អប្លែកជាងរាល់ដងដោយនៅថ្ងៃទី១ មានពិធីសែនទទួលទេវតា និងពិធីប្រកាសបើកព្រឹត្តិការណ៍សង្ក្រាន្ត ព្រមទាំងមានការរៀបចំព្រឹត្តិការណ៍សំខាន់ៗមួយចំនួនទៀត ដើម្បីបង្កការកម្សាន្តសប្បាយជូនដល់បងប្អូនប្រជាពលរដ្ឋភ្ញៀវទេសចរជាតិ និងអន្តរជាតិ ក្នុងនោះរួមមានព្រឹត្តិការណ៍ប្រដាល់គុនខ្មែរលំដាប់ប្រទេស ការប្រគំតន្ត្រីខ្នាតធំ ការរាំលេងកម្សាន្ត និងមានល្បែង និងរបាំប្រជាប្រិយ ប្រពៃណីខ្មែរទាំងថ្ងៃទាំងយប់។ លើសពីនេះក៏មានការតាំងពិព័រណ៍ភូមិមួយផលិតផលមួយរយៈពេល ៣ថ្ងៃ ហើយក៏មានពិធីស្រង់ព្រះផងដែរ។ ដោយឡែក នៅតាមបណ្ដាស្រុកទាំង ៩ ផ្សេងទៀត និងនៅតាមរមណីយដ្ឋាននានាក៏នឹងមានរៀបចំសង្ក្រាន្តផងដែរ។
ចំពោះ កំពង់ស្ពឺសង្ក្រាន្តវិញ នឹងប្រារព្ធធ្វើឡើងចាប់ពីថ្ងៃទី១៤ ដល់ថ្ងៃទី១៦ ខែមេសា នៅបរិវេណវិមានឯករាជ្យ ទីរួមខេត្ត ដោយការលេងល្បែងប្រជាប្រិយ ការប្រឡងចម្រៀង ការប្រគំតន្ត្រីខ្នាតយក្ស ពិធីស្រង់ព្រះ ពិធីទទួលទេវតាឆ្នាំថ្មី និងការបាញ់កាំជ្រួច។
លោក រស់ សុខ ប្រធានមន្ទីរទេសចរណ៍ខេត្តកំពង់ស្ពឺ បានមានប្រសាសន៍ប្រាប់អ្នកសារព័ត៌មានថា៖ រដ្ឋបាលខេត្តបានរៀបចំលម្អភ្លើងពណ៌តាមតំបន់សំខាន់ៗក្នុងខេត្ត ដើម្បីអបអរសាទរ ពិធីបុណ្យចូលឆ្នាំប្រពៃណីជាតិ និងដើម្បីទាក់ទាញភ្ញៀវទេសចរឱ្យមកកម្សាន្តសប្បាយក្នុងខេត្តកំពង់ស្ពឺ ឱ្យបានកាន់តែច្រើនបន្ថែមទៀត។
ទន្ទឹមនេះមន្ទីរទេសចរណ៍ខេត្តក៏បានចុះពង្រឹងគុណភាពសេវាកម្ម និងផលិតផលទេសចរណ៍ តាមគោលដៅធំៗ ជាពិសេសបានរម្លឹកពីការរក្សាគុណភាពផលិតផល ថែរក្សាបរិស្ថាន អនាម័យ និងរក្សាតម្លៃផលិតផលសេវាកម្មឱ្យបានសមរម្យ និងចុះត្រួតពិនិត្យលើបញ្ហាតម្លៃម្ហូបអាហារ ក៏ដូចជាសេវាស្នាក់នៅជាដើម។ លោកបានបន្តថា ជាការពិតការឡើងថ្លៃតិចតួច តែងតែមាន តែមិនត្រូវធ្វើឱ្យប៉ះពាល់អារម្មណ៍ភ្ញៀវទេសចរនោះទេ។
ចំណែកខេត្តប៉ៃលិនវិញ បានតុបតែងខ្លួនយ៉ាងល្អឆើត សម្រាប់សង្រ្កាន្តរយៈពេល៣ថ្ងៃផងដែរ។ បើតាមលោកជំទាវ បាន ស្រីមុំ អភិបាល នៃគណៈអភិបាលខេត្តប៉ៃលិន នៅក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរខាងមុននេះ រដ្ឋបាលខេត្តបានគ្រោងរៀបចំសង្ក្រាន្តប៉ៃលិន ឱ្យបានអធិកអាធមសម្រាប់បងប្អូនប្រជាពលរដ្ឋបានចូលរួមលេងកម្សាន្តសប្បាយ ដោយមានកម្មវិធីជាច្រើនរួមមាន៖ កម្មវិធីតាមបែបសាសនា ការលេងល្បែងប្រជាប្រិយខ្មែរ ការប្រគំតន្ត្រីខ្នាតធំ និងការដាក់តាំងពិព័រណ៍ផលិតផលនៅតាមទីតាំងសំខាន់ៗមួយចំនួនក្នុងខេត្ត សំដៅធ្វើយ៉ាងណាទាក់ទាញចំណាប់អារម្មណ៍ពីមហាជនទាំងក្នុងខេត្ត និងក្រៅខេត្ត មកលេងកម្សាន្តឱ្យបានច្រើនកុះករ។
លោកជំទាវ បាន ស្រីមុំ បន្តថាដើម្បីបង្កើនបរិយាកាសសប្បាយរីករាយដល់ប្រជាពលរដ្ឋ និងភ្ញៀវទេសចរមកលេងកម្សាន្ត រដ្ឋបាលខេត្ត រដ្ឋបាលក្រុង/ស្រុក មន្ទីរអង្គភាពជុំវិញខេត្ត និងកងកម្លាំងទាំង ៣ប្រភេទបានសហការគ្នាជាមួយសហភាពសហព័ន្ធយុវជនកម្ពុជាខេត្ត ធ្វើការតុបតែងលម្អភ្លើងពណ៌នៅតាមសួនច្បារ តាមអង្គភាព និងទីសាធារណៈឱ្យមានសោភណភាព ហើយនៅគ្រប់វត្តអារាម និងតំបន់ទេសចរណ៍ផ្សេងៗត្រូវរៀបចំកន្លែង និងទីធ្លាឱ្យបានស្អាតដូចជា៖ រមណីយដ្ឋានបេតិកភណ្ឌវប្បធម៌ប្រវត្តិសាស្ត្រភ្នំយ៉ាត រមណីយដ្ឋានធម្មជាតិទឹកធ្លាក់ ភ្នំខៀវ អូរតាវ៉ៅ បរិវេណវិមានឯករាជ្យខេត្ត និងដងស្ទឹងប៉ៃលិន។
ដើម្បីផ្សព្វផ្សាយពីវប្បធម៌ប្រពៃណីដ៏ល្អផូរផង់ របស់ប្រជាពលរដ្ឋក្នុងខេត្ត រដ្ឋបាលខេត្តបាត់ដំបង បានរៀបចំកម្មវិធីសិល្បៈ ការលេងល្បែងប្រជាប្រិយផ្សេងៗ ដើម្បីបង្ហាញដល់ភ្ញៀវជាតិ និងអន្តរជាតិឱ្យស្គាល់ ពីទំនៀមទម្លាប់នៃការរស់នៅ ក៏ដូចជាសក្តានុពលនានារបស់ខេត្តបាត់ដំបង តាមរយៈការរៀបចំដាក់តាំងបង្ហាញនូវផលិតផលតាមបណ្តាក្រុង-ស្រុកទាំង១៤ ការតាំងបង្ហាញមុខម្ហូបអ្នកបាត់ដំបង ដូចជា ខ្ទះយក្ស ក្រូចយក្ស ទុរេនយក្ស ណែមយក្ស ព្រមទាំងមានតំបន់ត្រជាក់ចិត្ត តំបន់ពាងទឹក សម្រាប់បងប្អូនប្រជាពលរដ្ឋមកលេងទឹកកម្សាន្ត ដោយចៀសវាងការគប់ទឹក ប៉ាតម្សៅតាមដងផ្លូវ ដែលអាចបណ្តាលឱ្យមានគ្រោះថ្នាក់ជាយថាហេតុ។
ជាមួយគ្នានេះ នៅពេលរាត្រីមានការអុជកាំជ្រួចរយៈពេលចំនួន៣ថ្ងៃ មិនត្រឹមតែប៉ុណ្ណោះក៏មានការប្រគុំតន្ត្រី ការប្រកួតកីឡាប្រដាល់គុនខ្មែរ ព្រមទាំងមានការរៀបចំតុបតែងលម្អភ្លើងពណ៌ នៅតាមទីតាំងសំខាន់ៗនានាក្នុងក្រុងបាត់ដំបង ដើម្បីត្រៀមស្វាគមន៍បងប្អូនប្រជាពលរដ្ឋមកផ្តិតយករូបភាពដ៏ស្រស់ត្រកាលនេះផងដែរ។
ខេត្តបន្ទាយមានជ័យ ក៏នឹងរៀបចំកម្មវិធីសង្ក្រាន្តឆ្នាំថ្មីផងដែរ នៅសួនតេជោឈ្នះឈ្នះ ក្រុងសិរីសោភ័ណដើម្បីអបអរពិធីបុណ្យចូលឆ្នាំខ្មែរ ព្រមទាំងបានចេញសេចក្តីណែនាំមួយចំនួនក្នុងនោះ រដ្ឋបាលខេត្ត ណែនាំឱ្យសមត្ថកិច្ចត្រូវចាត់កម្លាំងការពារ ២៤ម៉ោង លើ២៤ម៉ោង ដើម្បីធានាពីសុវត្ថិភាព សណ្តាប់ធ្នាប់ ក្នុងឱកាសនោះ។
ដោយឡែកនៅរាជធានីភ្នំពេញវិញ ដែលជាបេះដូងនៃព្រះរាជាណាចក្រកម្ពុជា បានរៀបចំព្រឹត្តិការណ៍ សង្ក្រាន្តវត្តភ្នំ នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ រយៈពេល ០៣ថ្ងៃ (១៤ ដល់ ១៦ មេសា) ចាប់ពីម៉ោង៨:០០នាទីព្រឹក ដល់ម៉ោង ២០:០០នាទីយប់។
ព្រឹត្តិការណ៍ជាច្រើននៃសង្ក្រាន្តវត្តភ្នំ មានដូចជា ព្រឹត្តិការណ៍បែបប្រពៃណីជាតិ និងកម្មវិធីកម្សាន្តសប្បាយជាច្រើនដូចជា ពិធីទទួលទេវតាឆ្នាំថ្មី ដង្ហែព្រះពុទ្ធរូប ពូនភ្នំខ្សាច់ ស្រង់ព្រះ សម្ដែងសិល្បៈរបាំប្រពៃណីលេងល្បែងប្រជាប្រិយ ប្រគំតន្ត្រីបុរាណ-សម័យ រាំលេងកម្សាន្ត ការតាំងបង្ហាញម្កុដអប្សរា-ពិណខ្នាតធំ និងការតាំងបង្ហាញផលិតផលខ្មែរ។
ជាមួយគ្នានេះដើម្បីផ្ដល់ភាពសប្បាយរីករាយបន្ថែមទៀត និងជាការថ្លែងអំណរគុណដល់បងប្អូនប្រជាពលរដ្ឋដែលបានចូលរួមសាទរគាំទ្រដំណើរការផ្លូវថ្មើរជើង (Walk Street) រដ្ឋបាលរាជធានីភ្នំពេញនឹងបើកដំណើរការផ្លូវថ្មើរជើង រយៈពេល០៥ថ្ងៃចាប់ពីថ្ងៃទី១២ ដល់១៦ ខែមេសា ឆ្នាំ២០២៥ តាមបណ្តោយតីរវិថីព្រះស៊ីសុវត្ថិ ចាប់ពីមុខព្រះបរមរាជវាំង រហូតដល់រមណីយដ្ឋានវប្បធម៌ប្រវត្តិសាស្ត្រវត្តភ្នំ។
ព្រឹត្តិការណ៍អង្គរសង្គ្រាន្ត ឯណោះវិញ ដែលរៀបចំឡើងក្រោមប្រធានបទ «ញញឹមសាទរសង្ក្រាន្តឆ្នាំថ្មី» សង្ឃឹមថានឹងទាក់ទាញសាធារណជនជាតិ និងអន្តរជាតិមកកម្សាន្តសប្បាយ ជាលក្ខណៈមហាគ្រួសារខ្មែរ ដោយព្រឹត្តិការណ៍នេះមានការគាំទ្រយ៉ាងពេញទំហឹងពីប្រមុខរាជរដ្ឋាភិបាលកម្ពុជា។
ព្រឹត្តការណ៍អង្គរសង្ក្រាន្ត ធ្វើឡើងក្នុងគោលបំណងដើម្បីជួបជុំយុវជន និងមហាជន ដើម្បីចូលរួមអបអរសាទរ ពិធីបុណ្យចូលឆ្នាំថ្មីប្រពៃណីជាតិខ្មែរ។ បន្ថែមពីនេះ អង្គរសង្ក្រាន្តក៏មានគោលបំណងរម្លឹក និងធ្វើឱ្យរស់រវើកឡើងវិញនៃ “មរតកបេតិកភណ្ឌអរូបី នៅលើទីតាំងនៃមរតកបេតិកភណ្ឌរូបី ដែលធ្វើឱ្យ “អង្គរមានជីវិត” ជាពិសេសនោះគឺផ្តល់ឱកាសឱ្យយុវជន ប្រជាជន ភ្ញៀវទេសចរជាតិ និងអន្តរជាតិ បានឈ្វេងយល់ និងទទួលបានបទពិសោធន៍បន្ថែមអំពីភាពរុងរឿង ល្បីល្បាញ ភាពសម្បូរបែបនៃវប្បធម៌ អរិយធម៌ខ្មែរ ក៏ដូចជាផ្តល់ឱកាសឱ្យពាណិជ្ជករ សហគ្រិន អាជីវករ ផលិតផលពាណិជ្ជកម្ម សិប្បកម្ម និងសេវាកម្មនានា ទទួលបានប្រយោជន៍ធុរកិច្ចពីកំណើនភ្ញៀវទេសចរ។ ឆ្នាំនេះអង្គរសង្ក្រាន្ត នឹងមានកម្មវិធីចំនួន ៣៨ ដោយមានក្រុមយុវជនស្ម័គ្រចិត្តចំនួនប្រមាណ ៥ ០០០នាក់។
ព្រឹត្តិការណ៍អង្គរសង្ក្រាន្តឆ្នាំនេះនឹងមានការសម្តែងសិល្បៈទស្សនីយភាព “ចង្វាក់បេះដូងអង្គរ” ដែលជាការផ្តល់បទពិសោធន៍ថ្មី និងផ្តល់ឱកាសដល់សាធារណជនអាចចូលរួមទស្សនាការសម្តែងក្នុងបរិវេណនៃប្រាសាទអង្គរវត្ត (បណ្ណាល័យខាងត្បូងនៃប្រាសាទអង្គរ) រយៈពេល៣យប់។ កម្មវិធីប្រកួតអុក ភូមិអាហារនៃក្តីស្រឡាញ់ ភូមិត្នោត ដែលមានការតាំងបង្ហាញនូវមួកស្លឹកត្នោតយក្សទំហំ ៨ម៉ែត្រ និងមានផ្ទះខ្មែរបុរាណ ដែលធ្វើពីដើមត្នោត។ ការតាំងបង្ហាញនូវក្រមា ១០០០ម៉ែត្រ ដែលបានបំបែកឯតទគ្គកម្មពិភពលោកជាក្រមាវែងជាងគេ ដែលសរសៃទី១ ត្រូវបានត្បាញដោយសម្ដេចព្រះមហាក្សត្រី ព្រះវររាជមាតាជាតិខ្មែរ និងសរសៃចុងក្រោយត្រូវបានត្បាញដោយសម្ដេចតេជោ ក្នុងបំណងគាំទ្រ ដល់ក្រមាខ្មែរ ដែលបានដាក់បញ្ចូលទៅក្នុងបញ្ជីតំណាងបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ (UNESCO)។
ជាមួយគ្នានេះ អង្គរសង្ក្រាន្តក៏នឹងមានកម្មវិធីថ្មីៗ និងប្លែកៗជាច្រើនទៀត ដូចជាការលេងល្បែងប្រជាប្រិយ និងទាញព្រ័ត្រមិត្តភាពអង្គរសង្ក្រាន្ត ព្រមទាំងកម្មវិធីតស់ៗលេងទឹក។ល។ ដែលនឹងបង្កើនភាពសប្បាយរីករាយកាន់តែខ្លាំងដល់សាធារណជន ភ្ញៀវជាតិ-អន្តរជាតិ។
ក្រៅពីនេះ រដ្ឋបាលខេត្តដទៃទៀតក៏បាននិងកំពុងពង្រឹងសន្តិសុខ សណ្ដាប់ធ្នាប់ អនាម័យ និងពង្រឹងសេវាកម្មម្ហូបអាហារឱ្យកាន់តែមានភាពល្អប្រសើរ ជាពិសេសរៀបចំហេដ្ឋារចនាសម្ព័ន្ធក្នុងខេត្ត និងនៅតាមរមណីយដ្ឋានទេសចរណ៍ ហើយមានរៀបចំលម្អភ្លើងពណ៌នៅតាមផ្លូវ និងតាមតំបន់ទេសចរណ៍ ដើម្បីស្វាគមន៍ភ្ញៀវទេសចរក្នុងថ្ងៃសង្ក្រាន្តផងដែរ។
គួររំលឹកជូនថា ស្ថិតិប្រជាពលរដ្ឋខ្មែរ និងភ្ញៀវទេសចរបរទេសដើរលេងកម្សាន្តក្នុងក្របខណ្ឌទូទាំងប្រទេស ក្នុងពិធីបុណ្យចូលឆ្នាំថ្មីប្រពៃណីជាតិខ្មែរ កាលពីឆ្នាំ២០២៤ សរុបប្រមាណ ២១,៧០លាននាក់ ខណៈទេសចរបរទេសប្រមាណ ១១ម៉ឺននាក់។
ក្រោមម្លប់នៃសន្តិភាព សង្ក្រាន្តត្រូវបានរៀបចំនៅគ្រប់ទីកន្លែងទាំងអស់នៅក្នុងព្រះរាជាណាចក្រកម្ពុជា ចាប់តាំងពីថ្នាក់រាជធានី ខេត្ត ក្រុង ស្រុក ខណ្ឌ ឃុំ សង្កាត់ នៅតាមក្រសួង-ស្ថាប័ន និងគ្រឹះស្ថានសិក្សានានា។ ប្រជាពលរដ្ឋពិតជាមានការសប្បាយរីករាយជាមួយនឹងអ្វីដែលបាននិងកំពុងកើតមាននៅក្នុងមាតុភូមិដ៏សុខសាន្តមួយនេះ បើទោះបីជាមានផលប៉ះពាល់ខាងសេដ្ឋកិច្ចដែលបណ្ដាលមកពីកត្តាខាងក្រៅមួយចំនួនក៏ដោយ៕
