សេចក្តីប្រកាសព័ត៌មានរបស់ទីភ្នាក់ងារសហប្រតិបត្តិការអន្តរជាតិកូរ៉េហៅកាត់ថា កយកា (KOICA)ប្រចាំកម្ពុជាបានប្រកាសឱ្យដឹងកាលពីថ្ងៃទី៣ ខែមេសា ឆ្នាំ២០២៥ ម្សិលមិញនាថ្ងៃទី៣ ខែមេសា ឆ្នាំ២០២៥ថា កាលពីថ្ងៃទី៣១ ខែមីនាទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) និងក្រសួងមុខងារសាធារណៈនៃរាជរដ្ឋាភិបាលកម្ពុជា បានផ្លាស់ប្តូរកំណត់ហេតុនៃកិច្ចពិភាក្សា(RD)ជាផ្លូវការសម្រាប់គម្រោងស្តីពីការពង្រឹងសមត្ថភាពសាលាភូមិន្ទរដ្ឋបាល(RSA) ដើម្បីកំណែទម្រង់អភិបាលកិច្ចនិងការពង្រឹងកម្ពុជា ដែលមានតម្លៃជាទឹកប្រាក់ប្រមាណជិត១២ លានដុល្លារអាមរិក។
កយកា បញ្ជាក់ថា គំនិតផ្តួចផ្តើមគម្រោងរយៈពេល ៥ឆ្នាំ ផ្តល់មូលនិធិដោយរដ្ឋាភិបាលកូរ៉េតាមរយៈកយកាដែលមានថវិកាសរុបចំនួន១១,៧លានដុល្លារនេះមានគោលបំណងលើកកម្ពស់ប្រសិទ្ធភាព និងប្រសិទ្ធផលនៃរដ្ឋបាលសាធារណៈរបស់កម្ពុជា តាមរយៈការកសាងសេវាសាធារណៈប្រកបដោយវិជ្ជាជីវៈ គណនេយ្យភាព និងត្រៀមខ្លួនជាស្រេចនាពេលអនាគត។
កយកាបន្ថែមថា កំណត់ហេតុនៃកិច្ចពិភាក្សា(RD)ត្រូវបានផ្លាស់ប្តូរតាមរយៈការឆ្លើយឆ្លងជាផ្លូវការរវាងភាគីទាំងពីរដោយបង្ហាញពីកិច្ចព្រមព្រៀងផ្លូវការដើម្បីអនុវត្តគម្រោងពីឆ្នាំ២០២៥ ដល់ឆ្នាំ២០២៩។គម្រោងនេះត្រូវបានតម្រឹមជាយុទ្ធសាស្ត្រ ជាមួយនឹងយុទ្ធសាស្ត្របញ្ចកោណដំណាក់កាលទី ១ (២០២៤-២០២៨) និងចក្ខុវិស័យរយៈពេលវែង ឆ្នាំ២០៥០ ជាពិសេស វារួមចំណែកដោយផ្ទាល់ដល់អាទិភាពជាតិនៃការអភិវឌ្ឍមូលធនមនុស្ស និងការអភិវឌ្ឍសេដ្ឋកិច្ចឌីជីថល និងសង្គម គាំទ្រដល់មហិច្ឆតារបស់រដ្ឋាភិបាលក្នុងការធ្វើទំនើបកម្ម ការផ្តល់សេវាសាធារណៈ និងជំរុញអភិបាលកិច្ចល្អ។
ក្នុងគំនិតផ្តួចផ្តើមគម្រោងនេះដែរ រួមមាន ការបង្កើតកម្មវិធីសិក្សាជាតិសម្រាប់មន្ត្រីរាជការ ដែលគាំទ្រដោយការសាងសង់មជ្ឈមណ្ឌលសិក្សាថ្មី និងការបង្កើតវេទិកាអប់រំឌីជីថល ដែលអាចប្រើប្រាស់បានដល់មន្ត្រីរាជការទាំងអស់នៅទូទាំងប្រទេស។
គប្បីជម្រាបជូនថា គម្រោងនេះនឹងបង្កើតកម្មវិធីសិក្សា និងខ្លឹមសារបណ្តុះបណ្តាលលម្អិតសម្រាប់ការអប់រំបច្ចេកវិទ្យាគមនាគមន៍ ព័ត៌មានវិទ្យា (ICT )សមស្របទៅនឹងតម្រូវការវិវត្តនៃរដ្ឋាភិបាលឌីជីថល។ កម្មវិធីនេះនឹងលើកកម្ពស់សមត្ថភាពរបស់មន្ត្រីរាជការក្នុងការប្រើប្រាស់ឧបករណ៍ និងប្រព័ន្ធឌីជីថលក្នុងការងារប្រចាំថ្ងៃរបស់ពួកគេ។
លោកស្រី ឆយ មូន ជុង ( CHOI Moon Jung) នាយិកាទីភ្នាក់ងារសហប្រតិបត្តិការអន្តរជាតិកូរ៉េ ប្រចាំប្រទេសកម្ពុជាបានបញ្ជាក់សាជាថ្មីនូវការប្តេជ្ញាចិត្តយ៉ាងមុតមាំរបស់ កយកា ចំពោះគោលដៅអភិវឌ្ឍន៍របស់កម្ពុជា ។លោកស្រីបន្ថែមថា«គម្រោងនេះ គឺជាមូលដ្ឋានគ្រឹះនៃការគាំទ្ររបស់កយកាសម្រាប់កំណែទម្រង់អភិបាលកិច្ចរបស់ប្រទេសកម្ពុជា។ តាមរយៈការពង្រឹងសាលាភូមិន្ទរដ្ឋបាល យើងមានគោលបំណងចូលរួមចំណែកដល់ការសម្រេចបាននូវយុទ្ធសាស្ត្របញ្ចកោណ និងចក្ខុវិស័យកម្ពុជាឆ្នាំ២០៥០ ជាពិសេសក្នុងវិស័យអាទិភាពនៃបរិវត្តកម្មមូលធនមនុស្ស និងឌីជីថល។ គំនិតផ្តួចផ្តើមនេះនឹងផ្តល់អត្ថប្រយោជន៍ដោយផ្ទាល់ដល់មន្ត្រីរាជការថ្នាក់កណ្តាលប្រមាណ ៣៩ ០០០ នាក់ ក៏ដូចជាជះឥទ្ធិពលដល់មន្ត្រីរាជការមូលដ្ឋានប្រហែល ១៧២ ០០០នាក់ តាមរយៈប្រព័ន្ធនិងកម្មវិធីបណ្តុះបណ្តាលដែលប្រសើរឡើង»។
គប្បីជម្រាបជូនដែរថា គម្រោងនេះក៏ឆ្លើយតបទៅនឹងកំណែទម្រង់មុខងារសាធារណៈនាពេលថ្មីៗនេះ ដែលផ្តួចផ្តើមដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា រួមទាំងការដាក់ឱ្យប្រើប្រាស់ប្រព័ន្ធប្រឡងសេវាសាធរណៈជាតិស្តង់ដារ។ ក្នុងនាមជាស្ថាប័នអនុវត្តកំណែទម្រង់ទាំងនេះ សាលាភូមិន្ទរដ្ឋបាល (RSA) នឹងទទួលបានការគាំទ្រពីស្ថាប័នសំខាន់ៗតាមរយៈជំនួយរបស់ កយកា-KOICA ដើម្បីលើកកម្ពស់តួនាទី និងសមត្ថភាពរបស់ខ្លួន៕
