កាលពីចុងសប្ដាហ៍កន្លងទៅ មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ និងក្រុមការងាររៀបចំនិងអនុវត្តគម្រោងសិក្សាបឋមបណ្ដាញរថភ្លើងក្រោមដីឬម៉េត្រូ(Metro )នៅរាជធានីភ្នំពេញបានជួបពិភាក្សាជាមួយក្រុមជំនួយការបច្ចេកទេសពីធនាគារវិនិយោគហេដ្ឋារចនាសម្ព័ន្ធអាស៊ី ហៅកាត់ថា អេ អាយ អាយ ប៊ី (AIIB )។
កិច្ចជំនួបប្រជុំដែលដឹកនាំដោយ លោកជំទាវ សេរី សុរិយា អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ នេះបានពិភាក្សាលើទិន្នន័យព័ត៌មានពាក់ព័ន្ធទៅនឹងកិច្ចការក្រសួងរៀបចំដែនដី នគរូបនីយកម្មនិងសំណង់ ដើម្បីតម្រង់ទិសគម្រោងរៀបចំឱ្យចំគោលដៅ ។
គប្បីជម្រាបជូនផងដែរថា កាលពីសប្ដាហ៍មុននេះដែរ គម្រោងសិក្សាបឋមបណ្ដាញរថភ្លើងក្រោមដី ឬម៉េត្រូនៅក្នុងរាជធានីភ្នំពេញ ក៏បានបើកកិច្ចប្រជុំលើកទី១ដោយមានការចូលរួមពីក្រសួងសាធារណការនិងដឹកជញ្ជូន និងក្រុមជំនួយបច្ចេកទេសពីធនាគារវិនិយោគហេដ្ឋារចនាសម្ព័ន្ធអាស៊ី (AIIB )ដូចគ្នានឹងកិច្ចប្រជុំរបស់ក្រសួងរៀបចំដែនដីដែរ។
ក្រោយកិច្ចប្រជុំក្រសួងសាធារណការ បានប្រកាសឱ្យដឹងថា កិច្ចប្រជុំនេះ ធ្វើឡើងដើម្បីពិនិត្យមើលវឌ្ឍនភាព នៃដំណើរការសិក្សាគម្រោង ព្រមទាំងធ្វើការពិភាក្សា និងប្រមូលធាតុចូលលើរបាយការណ៍ចាប់ផ្តើមពីសំណាក់អ្នកជំនាញការ ទីប្រឹក្សា និងភាគីពាក់ព័ន្ធ។ ក្រោយកិច្ចពិភាក្សាក្រុមការងារអនុវត្តគម្រោងនិងអ្នកជំនាញការនៃAIIB នឹងធ្វើការចុះទស្សនកិច្ចសិក្សាបន្ថែមក្នុងការប្រមូលធាតុចូលទៅតាមទីតាំងដែលបានកំណត់ក្នុងបណ្តាញផ្លូវរបៀងធំៗក្នុងរាជធានីភ្នំពេញ ព្រមទាំងចុះពិនិត្យស្ថានីយចំណតឡានក្រុង ស្ថានីយរថភ្លើងរាជធានីភ្នំពេញ អាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិតេជោ តំបន់អភិវឌ្ឍថ្មី ក្រុងរណបថ្មី និងទីតាំងផ្សេងៗទៀត ដើម្បីកំណត់ខ្សែផ្លូវ សម្រាំង និងខ្សែផ្លូវអាទិភាព សម្រាប់សិក្សាសមិទ្ធិលទ្ធភាព និងពិនិត្យលទ្ធភាពក្នុងការសាងសង់ បណ្តាញដឹកជញ្ជូនសាធារណៈក្រុង ក្នុងរាជធានីភ្នំពេញនាពេលអនាគត ។
ក្រសួងសាធារណការ ឱ្យដឹងទៀតថា គម្រោងសិក្សាបឋមបណ្តាញរថភ្លើងក្រោមដីនៅរាជធានីភ្នំពេញ បានចុះអនុស្សរណៈនៃការយោគយល់គ្នារវាងក្រសួងសាធារណការ និងដឹកជញ្ជូន និងធនាគារវិនិយោគហេដ្ឋារចនាសម្ព័ន្ធអាស៊ី (AIIB) នៅថ្ងៃទី២៦ ខែកញ្ញា ឆ្នាំ២០២៤ ទីក្រុងប៉េកាំង នៃសាធារណរដ្ឋប្រជាមានិតចិន។
ក្រសួងសាធារណការបញ្ជាក់ថា ការសិក្សានេះគ្រាន់តែជាការសិក្សាលើការដឹកជញ្ជូនសាធារណៈក្នុងក្រុងភ្នំពេញមួយបែបទៀត ដើម្បីបំពេញបន្ថែមលើការសិក្សាការដឹកជញ្ជូនសាធារណៈ ដែលក្រសួង និងសាលាក្រុងភ្នំពេញ បានសិក្សារួចមកហើយ រួមមាន light rail train, Automated Guide Transit, Bus Rapid Transit, Tramways ដើម្បីឱ្យក្រសួងមានមូលដ្ឋានក្នុងការជ្រើសរើសប្រព័ន្ធ ឬអន្តរដឹកជញ្ជូនណាមួយ ដែលមានប្រសិទ្ធភាពខ្ពស់ក្នុងការដោះស្រាយបញ្ហាកកស្ទះ និងគ្រោះថ្នាក់ចរាចរណ៍ រក្សាបានបរិស្ថាន និងសោភ័ណភាពទីក្រុង និងមានតម្លៃសមរម្យជូនប្រជាជនទូទៅ មិនមែនមានន័យថាសិក្សាហើយ ដាច់ខាតត្រូវតែសាងសង់នោះទេ ៕
