ព្រះរាជាណាចក្រកម្ពុជា សាធារណរដ្ឋប្រជាមានិតចិន និងយូនីសេហ្វ បានចាប់ដៃគូដើម្បីពង្រឹងការអប់រំ សុខភាព អាហារូបត្ថម្ភ និងអនាម័យសម្រាប់កុមារនៅសហគមន៍ដែលរងគ្រោះនៅកម្ពុជា។ គម្រោងនេះនឹងប្រកាសដាក់ដំណើរការជាផ្លូវការនៅរសៀលថ្ងៃទី៥ ខែមីនា ឆ្នាំ២០២៥ នាសណ្ឋាគារ រ៉ាហ្វាលឡឺរ៉ូយ៉ាល់ ភ្នំពេញ ក្រោមអធិបតីភាពឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល ឯកឧត្តម វ៉ាង វ៉ិនប៊ីន (HE. Mr. Wang Wenbin) ឯកអគ្គរដ្ឋទូត វិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា លោកបណ្ឌិត វីល ផាកស៍ (Will Parks)នាយកយូនីសេហ្វប្រចាំកម្ពុជា ។
យោងតាមកម្មវិធីដែលប្រាប់ឱ្យដឹងដោយយូនីសេហ្វ ប្រចាំកម្ពុជា បានឱ្យដឹងថា ក្នុងព្រឹត្តិការណ៍នឹងមានសុន្ទរកថាស្វាគមន៍ របស់លោកបណ្ឌិត Will Parks នាយកយូនីសេហ្វ ប្រចាំនៅកម្ពុជា , ចំណាប់អារម្មណ៍របស់ឯកឧត្តម វ៉ាង វ៉ិនប៊ីន (HE. Mr. Wang Wenbin) ឯកអគ្គរដ្ឋទូត វិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា និង មតិសំណេះសំណាលរបស់ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងប្រកាសដាក់ឱ្យដាក់ដំណើរការគម្រោង ។
សូមជម្រាបថា ដោយមានការគាំទ្រពីទីភ្នាក់ងារសហប្រតិបត្តិការអភិវឌ្ឍន៍អន្តរជាតិនៃសាធារណរដ្ឋប្រជាមានិតចិន មានគោលបំណងបំពេញចន្លោះខ្វះខាតនៃគុណភាព និងលទ្ធភាពក្នុងការទទួលសេវាកម្មសំខាន់ៗសម្រាប់កុមារ ស្ត្រី និងគ្រួសារកម្ពុជា។ សេវានេះរួមមានការថែទាំទារកទើបនឹងកើត ការគាំទ្រកុមារមានពិការភាព ការជួយដល់កុមារដែលមានហានិភ័យនៃកង្វះអាហារូបត្ថម្ភ ជនជាតិភាគតិច និងគ្រួសារដែលងាយរងគ្រោះ ក្នុងតំបន់ដាច់ស្រយាល៕
