ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានមានប្រសាសន៍ថា អ្នកប្រើប្រាស់ទូរសព្ទចល័ត និងសេវាអ៊ីនធឺណិតនៅក្នុងប្រទេសកម្ពុជាបានកើនឡើងជាបន្តបន្ទាប់ ។គិតត្រឹមចុងឆ្នាំ២០២៤ ទូទាំងប្រទេសមានអ្នកប្រើប្រាស់ទូរសព្ទចល័តចំនួន ២០,៦លាន។មានន័យថា មនុស្សម្នាក់អាចមានទូរសព្ទ ២គ្រឿង និងខ្លះ ៣គ្រឿង ចំណែកអ្នកប្រើប្រាស់សេវាអ៊ីនធឺណិតក៏កើនឡើងដល់ចំនួន១៩លាន ។
ឯកឧត្តម ជា វ៉ាន់ដេត បានមានប្រសាសន៍នៅក្នុងពិធីបិទសន្និបាតកាលពីរសៀលថ្ងៃទី៦ ខែកុម្ភៈ ឆ្នាំ២០២៥ ទៀតថា ក្នុងរយៈពេល៥ឆ្នាំចុងក្រោយនេះ ក្រសួងប្រៃសណីយ៍ និងទូរគមនាគមន៍ បានផ្ដល់អាជ្ញាបណ្ណប្រតិបត្តិការទូរគមនាគមន៍សរុបចំនួន៥៩ ក្នុងនោះអាជ្ញាបណ្ណទូរសព្ទចំនួន៤អាជ្ញាបណ្ណ ,ខ្សែកាបអុបទិកក្រោមបាតសមុទ្រចំនួន២ អាជ្ញាបណ្ណ ,ខ្សែកាបអុបទិកលើគោកចំនួន៥ និងអ៊ីនធឺណិតចំនួន៣៩អាជ្ញាបណ្ណ ។
ឯកឧត្តមរដ្ឋមន្រ្តីក្រសួងប្រៃសណីយ៍បង្ហាញតួលេខថា គិតត្រឹមឆ្នាំ២០២៤ អ្នកប្រើប្រាស់សេវាទូរសព្ទមានចំនួនប្រមាណ ២០,៦លាន និងសេវាអ៊ីនធឺណេតចំនួន ១៩លាន ។ដើម្បីជំរុញ និងសម្រួលដល់ការប្រើប្រាស់កាន់តែងាយស្រួល និងលឿនរហ័ស ក្រសួងបានជំរុញការអភិវឌ្ឍហេដ្ឋារចនាសម្ព័ន្ធតភ្ជាប់ឌីជីថល រួមមានបង្គោលអង់តែនទូរសព្ទ បណ្ដាញខ្សែកាបអុបទិកក្រោមបាតសមុទ្រ និងលើគោក ។ ក្នុងរយៈពេលប៉ុន្មានឆ្នាំមកនេះ ក្រសួងបានសង់បង្គោលអង់តែនទូរសព្ទសរុបចំនួន ១១ ៥១១បង្គោល ។ក្រសួងមានផែនការជំរុញសាងសង់បង្គោលអង់តែនទូរសព្ទបន្ថែមចំនួន ៣ ៦៧៤ ដែលមានចំនួនស្ថានីយអង់តែនសរុប ៦ ៣៥៥ ត្រឹមឆ្នាំ២០២៧ ។ដោយឡែកនៅរាជធានីភ្នំពេញ ក្រសួងបានសាងសង់បង្គោលអង់តែនបន្ថែមចំនួន ៤១៦ ក្នុងចំណោម១ ០០០បង្គោល ។ក្រសួងក៏បានចាត់ក្រុមការងារចំនួន៩ក្រុម ចុះត្រួតពិនិត្យអគារកម្ពស់ចាប់ពី៦ជាន់ឡើង ដើម្បីជំរុញសេវាទូរសព្ទ និងអ៊ីនធឺណិតនៅក្នុងអគារ ។
ក្រៅពីនៅរាជធានីភ្នំពេញ ឯកឧត្តមរដ្ឋមន្រ្តីក្រសួងប្រៃសណីយ៍បានបន្ថែមថា ក្រសួងបានសាងសង់បង្គោលអង់តែននៅខេត្តតាកែវ ខេត្តកណ្ដាល និងខេត្តសៀមរាបចំនួន១៩២ ក្នុងចំណោមផែនការ ៣៩៤បង្គោល និងបន្តសាងសង់បន្ថែមទៀតនៅតាមទីរួមខេត្ត ទីរួមស្រុក និងតំបន់ប្រជុំជននៅតាមឃុំ សង្កាត់ នៃបណ្ដាខេត្តនានាព្រមទាំងនៅតាមតំបន់ទេសចរណ៍ដាច់ស្រយាល ដោយប្រើមូលនិធិកាតព្វកិច្ចសេវាសកល ។ ដោយឡែកសម្រាប់បណ្ដាញខ្សែកាបអុបទិកលើគោកក៏បានសាងសង់បានប្រវែងប្រមាណ ៣៤ ៤៩១គីឡូម៉ែត្រ ក្នុងនោះបំពង់កប់ក្រោមដីមានប្រវែង ២ ៩២៣គីឡូម៉ែត្រ និងក្រោមបាតសមុទ្រប្រវែង ២៦ ៣០០គីឡូម៉ែត្រ និងគ្រោងសាងបណ្ដាញថ្មីប្រវែង ២ ៨៨៧គីឡូម៉ែត្រនៅឆ្នាំ ២០២៦ ៕
