ឯកឧត្តម គីម វីរៈ អគ្គលេខាធិការនៃគណៈកម្មាធិការជាតិគ្រប់គ្រងគ្រោះមហន្តរាយ បានដឹកនាំប្រតិភូចូលរួមក្នុង លំហាត់សមយុទ្ធ សុវត្ថិភាព អាតិច ២០២៥ (Safe Arctic 2025) នៅទីក្រុងអាខាន់ហ្គែល ប្រទេសរុស្ស៊ី ចាប់ពីថ្ងៃទី ២៩-៣០ ខែមករា ឆ្នាំ២០២៥ ។
ប្រភពគណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងនៅថ្ងៃទី៣០ ខែមករានេះថា ព្រឹត្តិការណ៍នេះមានការចូលរួមអនុវត្តលំហាត់សមយុទ្ធសរុបប្រមាណ ១ ០០០ នាក់ និង ប្រតិភូតំណាងមកពី ប្រទេសចំនួន២៥ ។ លំហាត់សមយុទ្ធនេះបានការចូលរួមបើកដោយ អនុរដ្ឋមន្រ្តីក្រសួងគ្រោះមហន្តរាយរុស្ស៊ី និងអភិបាលក្រុងអាខាន់ហ្គែល។
ក្នុងឱកាសបំពេញការងារនៅទីនោះឯកឧត្តម គីម វីរៈ អគ្គលេខាធិការព្រមជាមួយថ្នាក់ដឹកនាំ និងប្រតិភូទាំងអស់ បានចូលរួមគោរពវិញ្ញាណក្ខន្ធ និងដាក់កម្រងផ្កាជូនដល់វីរៈជនដែលបានពលីជីវិត ក្នុងសង្រ្គាម នៅវិមានឯករាជ្យនៃទីក្រុងអាខាន់ហ្គែ និងបានចូលរួមក្នុងពិធីតាំងពិព័រណ៍ឧបករណ៍សង្រ្គោះគ្រោះមហន្តរាយ នៅសាកលវិទ្យាល័យអប់រំជាន់ខ្ពស់នៃសហព័ន្ធរុស្ស៊ី ក្នុងតំបន់អាទិច។
ឯកឧត្តម និងគណៈប្រតិភូ បានចូលរួមទស្សនា សកម្មភាពអនុវត្តជាក់ស្តែង លំហាត់សមយុទ្ធសង្រ្គោះនាវាមានអគ្គិភ័យដែលកកជាប់គាំនៅក្នុងសមុទ្រទឹកកក៕
