ភ្នំពេញ៖ សម្រាប់ឆ្នាំ ២០២៤, គ្រឹះស្ថានអង្គរប្រមូលចំណូលសរុបបាន ចំនួន ៤៩,៦៧ លានដុល្លារ អាម៉េរិក ដែលក្នុងនោះ ចំណូលឧបត្ថម្ភមូលនិធិគន្ធបុប្ផាកម្ពុជា មានចំនួន ២,០៤ លាន ដុល្លារអាម៉េរិក។
ឈរលើនិន្នាការថ្មី ក្រោយវិបត្តិនៃជំងឺកូវីដ-១៩, នៅដើមឆ្នាំ ២០២៤ ឯកឧត្ដម ឈន សុភាព រដ្ឋលេខាធិការ តំណាងឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានណែនាំ គ្រឹះស្ថានអង្គរ ឱ្យត្រៀមខ្លួនសម្រាប់ការទទួលទេសចរអន្តរជាតិដែលនឹងកើនឡើង ដោយ ត្រូវពិនិត្យឡើងវិញ នូវរាល់បញ្ហាប្រឈមនៃការអនុវត្តការងារ ដែលបានជួបប្រទះក្នុង រយៈពេលប៉ុន្មានឆ្នាំកន្លងទៅ និង ធ្វើការវាយតម្លៃលើយន្តការនៃការលក់សំបុត្រ, ចាប់តាំង ពីការចាប់ផ្តើមលក់ រហូតដល់ការពិនិត្យសំបុត្រ, ជាពិសេស ត្រូវពិនិត្យឡើងវិញឲ្យបានគ្រប់ ជ្រុងជ្រោយ នូវការកែសម្រួល ឬ ការលុបចោលតែម្តងនូវមុខងារណា ដែលជាបន្ទុកដល់ ទេសចរ ឬ ដែលមិនមានតម្លៃបន្ថែមខ្ពស់ សំដៅកែទម្រង់ប្រព័ន្ធលក់សំបុត្រ សម្រាប់អនុវត្ត ក្នុងរយៈពេលវែង ឲ្យបានរលូន ប្រកបដោយប្រសិទ្ធភាព និង ស័ក្តិសិទ្ធភាពខ្ពស់។
ក្នុង«ពិធីប្រកាសដាក់ឱ្យអនុវត្តជាផ្លូវការ នូវប្រព័ន្ធលក់សំបុត្រ និង ការត្រួតពិនិត្យសំបុត្រចូលទស្សនារមណីយដ្ឋានអង្គរ»នាព្រឹកថ្ងៃព្រហស្បតិ៍ ២ កើត ខែបុស្ស ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី ៣០ ខែ មករា គ.ស. ២០២៥នេះ ឯកឧត្ដម ឈន សុភាព រដ្ឋលេខាធិការ បានរម្លឹកឱ្យដឹងថា ទេសចរអន្តរជាតិដែលចូលទស្សនាក្នុងតំបន់រមណីយដ្ឋានអង្គរ, បើទោះបីជាមិនបានចូលទស្សនាក្នុងប្រាសាទនីមួយៗ, ក៏តម្រូវឱ្យទិញសំបុត្រ ចូលទស្សនារមណីយដ្ឋានអង្គរដែរ។ ការណ៍នេះធ្វើឱ្យមានតម្រូវការ ក្នុងការដាក់ស្ថានីយ ត្រួតពិនិត្យសំបុត្រជាច្រើនកន្លែងនៅតាមដងផ្លូវនានា។ ក្នុងពេលរៀបចំប្រព័ន្ធអេឡិចត្រូនិក សម្រាប់គ្រប់គ្រងប្រតិបត្តិការលក់សំបុត្ររបស់គ្រឹះស្ថានអង្គរ ក៏មានតម្រូវការក្នុងការប្រមូលព័ត៌មានពីទេសចរអន្តរជាតិ ដូចជា សញ្ជាតិ, ក្រុមអាយុ និង ភេទ ជាដើម សម្រាប់យកមកធ្វើគោលនយោបាយ ក្នុងការទាក់ទាញទេសចរអន្តរជាតិ ទៅអនាគតបន្ថែមទៀត ។
ក្នុងន័យនេះ, ការធ្វើទំនើបកម្មកន្លងមក គឺផ្អែកលើនីតិវិធីចាស់ ស្ទើរតែទាំងស្រុង។ ជាលទ្ធផល, ការដាក់ឱ្យចាប់ផ្តើមប្រើប្រាស់ប្រព័ន្ធបច្ចេកវិទ្យាព័ត៌មាន កាលពីឆ្នាំ ២០១៦ ដល់ ឆ្នាំ ២០១៩ អាចដោះស្រាយ និង សម្រួលមួយផ្នែកនៃនីតិវិធី ចាស់, ក៏ប៉ុន្តែ មិនបានដោះស្រាយទាំងស្រុង នូវបញ្ហាប្រឈមដទៃទៀតឡើយ។ ការណ៍នេះ ទាមទារឱ្យមានការកែទម្រង់ការលក់សំបុត្រ, ការកំណត់ឡើងវិញនូវទិន្នន័យដែលតម្រូវឱ្យ ទេសចរអន្តរជាតិផ្តល់ជូន និង ការកំណត់ឡើងវិញនូវរំហូរនៃការត្រួតពិនិត្យសំបុត្រផងដែរ។
នៅក្នុងបរិការណ៍នេះ, គ្រឹះស្ថានអង្គរ បានសហការជិតស្និទ្ធជាមួយអគ្គលេខាធិការដ្ឋាន នៃគណៈកម្មាធិការសេដ្ឋកិច្ច និង ធុរកិច្ចឌីជីថល, ដោយមានការគាំទ្របច្ចេកទេសបន្ថែម ពីធនាគារវឌ្ឍនៈអាស៊ី ចំកាត់ ហៅកាត់ថា ABA, ដើម្បីធ្វើការសិក្សាមួយ ស្តីពីការកែទម្រង់ ការគ្រប់គ្រងប្រតិបត្តិការលក់សំបុត្រចូលទស្សនារមណីយដ្ឋានអង្គរ ឱ្យកាន់តែប្រសើរ និង ការបន្តធ្វើទំនើបកម្មប្រព័ន្ធបច្ចេកវិទ្យាព័ត៌មាន ជាមួយនឹងការពិនិត្យលទ្ធភាពលុបចោល ទាំងស្រុង នូវព័ត៌មានផ្ទាល់ខ្លួន ដែលធ្លាប់តម្រូវឱ្យភ្ញៀវទេសចរអន្តរជាតិផ្តល់ជូន។ ការសិក្សានេះ ត្រូវបានធ្វើឡើងយ៉ាងលម្អិត តាមរយៈការចុះសម្ភាសន៍ផ្ទាល់ និង ការអង្កេត លើគ្រប់តួអង្គពាក់ព័ន្ធ។ ជាមួយនឹងលទ្ធផលនៃការសិក្សានេះ, ដោយមានការពិគ្រោះយោបល់ ជាមួយវិស័យឯកជនផងដែរ និង ជាពិសេស ដោយមានការណែនាំតម្រង់ទិសបន្ថែមដ៏ ខ្ពង់ខ្ពស់ជាបន្តបន្ទាប់ ពីសំណាក់ សម្តេចមហាបវរធិបតី នាយករដ្ឋមន្ត្រី, គម្រោង កែទម្រង់ប្រព័ន្ធលក់សំបុត្ររបស់គ្រឹះស្ថានអង្គរ ត្រូវបានរៀបចំឡើងដោយជោគជ័យ និង កើតចេញជាផ្លែផ្កាដ៏ត្រចះត្រចង់ នាថ្ងៃនេះ៕
