បាត់ដំបង៖ ឯកឧត្តម សុខ លូ អភិបាលខេត្តបាត់ដំបង បានណែនាំឲ្យក្រុមការងារពាក់ព័ន្ធ មានមន្ទីរកសិកម្ម មន្ទីរធនធានទឹក ធ្វើយ៉ាងណាខិតខំបន្តរកដំណោះស្រាយ ទឹកជួយសង្គ្រោះដំណាំស្រូវ របស់ប្រជាកសិករ ឲ្យអស់លទ្ធភាព និងបន្តពន្យល់ប្រជាពលរដ្ឋកុំបន្តដាំដុះស្រូវបន្ថែមទៀតក្នុងរដូវប្រាំងនេះ។ ឯកឧត្តមបញ្ជាក់ថាទន្ទឹមនឹងជួយអន្តារគមន៍ទឹកស្រោចស្រពស្រូវកសិករ មន្រ្តីជំនាញត្រូវគិតគូរ ពីការរក្សាទឹកទុកសម្រាប់សត្វពាហន: និងមនុស្សផងដែរ ព្រោះរដូវប្រាំងឆ្នាំនេះអូសបន្លាយមារយះពេលវែងទៀត ។
ការលើកឡើងខាងលើនេះខណៈឯកឧត្តមសុខលូ បានដឹកនាំក្រុមការងារជំនាញនៃមន្ទីរអង្គភាពពាក់ព័ន្ធចុះពិនិត្យមើលស្ថានភាពបង្កបង្កើនផលស្រូវរដូវប្រាំង និងពិនិត្យមើការផ្គត់ផ្គង់ទឹក ដល់បងបងប្អូនប្រជាកសិករ នៅស្រុកថ្មគោល ស្រុកបវេល និងស្រុកបាណន់ នាថ្ងៃទី២៣ខែមករាឆ្នាំ២០២៥។ លោក ខៃ សុដា អនុប្រធានមន្ទីរធនធានទឹក និងឧតុនិយមខេត្តបាត់ដំបង បានផ្តល់របាយការណ៍ឲ្យដឹងថា ប្រព័ន្ធធារាសាស្រ្តខេត្តបាត់ដំបងដែលមានលទ្ធភាពស្រោចស្រព ស្រូវប្រាំងរបស់ កសិករមានប្រព័ន្ធធារាសាស្ត្រស្ទឹងមោងឬស្សី, ប្រព័ន្ធធារាសាស្ត្រស្តែងសង្កែ, ប្រព័ន្ធធារាសាស្ត្រស្ទឹងមង្គលបុរី, ប្រព័ន្ធធារាសាស្ត្រអាងកំពីងពួយ, ប្រព័ន្ធធារាសាស្ត្រអាងភាស, អាងដង្កោ, ប្រព័ន្ធធារាសាស្ត្រអាងបាដាក, និងប្រព័ន្ធធារាសាស្ត្រអាងត្រជាក់ចិត្ត ។
លោកបន្ថែមថាតាមផែនការមន្រ្តីជំនាញឱ្យកសិករដាំដុះស្រូវប្រាំង តែ២៧០០០ហិកតាប៉ុន្តែគិតត្រឹមថ្ងៃទី ២០ ខែមករា ឆ្នាំ២០២៥ ប៉ុន្តែកសិករបានដាំដុះរហូតដល់ ៨៦១១៥ ហិកតា គឺធ្វើលើសផែនការ រហូតដល់៥៩១១៥ ហិកតា។ ការដាំដុះលើសផែនការជិតប្រាំមួយម៉ឺនហិកតានេះ មន្ទីរជំនាញ អាចផ្តល់ទឹកជួយសង្គ្រោះបានតែ៣១៦៩៤ ហិកតាប៉ុណ្តោះ ចំណែកស្រូវប្រាំង ២៧៤២១ ហិកតាទៀតមិនមានលទ្ធភាពជួយសង្គ្រោះបាននោះទេ ។
ក្នុងឱកាសនោះឯកឧត្តម អភិបាលខេត្ត បានជួបសំណេះសំណាលសួរសុខទុក្ខជាមួយបងប្អូនប្រជាកសិករដែលកំពុងបង្កបង្កើនផលស្រូវប្រាំងនៅតំបន់តេជោសែនអូរតាគី ឃុំអូរតាគី ស្រុកថ្មគោល និងចុះត្រួតពិនិត្យស្ថានភាពទឹក នៅសំណង់ស្ទាក់ទឹកបវេល ដែលស្ថិតក្នុងឃុំបួវិល ស្រុកបវេល និងសំណង់ស្ទាក់ទឹកតាហែន ឃុំក្ដុលតាហែន ស្រុកបវេល និងបន្តចុះពិនិត្យស្រូវប្រាំងរបស់បងប្អូនប្រាកសិករ ដែលកំពុងខ្វះខាតទឹកមួយចំនួន ស្ថិតនៅភូមិសៀម ឃុំអំពិលប្រាំដើម ស្រុកបវេល ។ឯកឧត្តមបន្តចុះពិនិត្យការងាររៀបចំសណ្តាប់ធ្នាប់តាមដងផ្លូវ ជាប់នឹងទំនប់អាងកំពីងពួយ និងពិនិត្យមើលការងារបង្កបង្កើនផលស្រូវរដូវប្រាំង និងស្ថានភាព នៃការផ្គត់ផ្គង់ទឹក នៃប្រព័ន្ធធារាសាស្រ្តអាងកំពីងពួយ ស្ថិតក្នុងឃុំតាគ្រាម ស្រុកបាណន់ ខេត្តបាត់ដំបងផងដែរ៕
