កំពង់ឆ្នាំង៖ ដោយបានការអនុញ្ញាតពី លោកឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្តកំពង់ឆ្នាំង និងមានការសម្របសម្រួលពី ឯកឧត្តម ឯក ស៊ុនរស្មី ព្រះរាជអាជ្ញានៃអយ្យការអមសាលាដំបូងខេត្តកំពង់ឆ្នាំង នៅវេលាម៉ោង១៨:៣០នាទីល្ងាច ថ្ងៃទី២២ ខែមករា ឆ្នាំ២០២៥ កម្លាំងការិយាល័យព្រហ្មទណ្ឌកងរាជអាវុធហត្ថខេត្តចំនួន០៤នាក់ មធ្យោបាយរថយន្ត០១គ្រឿង ដឹកនាំដោយលោក វរសេនីយ៍ទោ លឹម ហាក់ ប្រធានមន្ទីរស្រាវជ្រាវនិងបង្ក្រាបបទល្មើស បានចុះសហការជាមួយកម្លាំងជំនាញកងរាជអាវុធហត្ថខេត្តបន្ទាយមានជ័យ ដឹកនាំដោយលោក វរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវនិងបង្ក្រាបបទល្មើស សរុបកម្លាំងចំនួន០៨នាក់ បានចុះអនុវត្តដីកាបង្គាប់ឱ្យចាប់ខ្លួនជនត្រូវចោទចំនួន០១នាក់ ឈ្មោះ ចាន់ ផល្លីន ភេទស្រី អាយុ៣៩ឆ្នាំ សញ្ជាតិខ្មែរ មុខរបរ(ប្រធានសាខាចលនាយុវជនកម្ពុជាក្រុម១៥៧) អាស័យដ្ឋានស្នាក់នៅភូមិរំចេក២ សង្កាត់រតនៈ ក្រុងបាត់ដំបង ខេត្តបាត់ដំបង។ តាមអំណាចដីកាបង្គាប់ឲ្យចាប់ខ្លួនលេខ១៣៣/០២១ ចុះថ្ងៃទី០២ ខែសីហា ឆ្នាំ២០២១ ចេញដោយ ឯកឧត្តម គឹម រ័ត្នណារិន ចៅក្រមស៊ើបសួរសាលាដំបូងខេត្តកំពង់ឆ្នាំង ដែលបានពាក់ព័ន្ធក្នុងករណី”ឆបោក និងប្រើប្រាស់ឯកសារសាធារណៈក្លែងក្លាយ” ប្រព្រឹត្តកាលពីថ្ងៃទី១២ ខែកញ្ញា ឆ្នាំ២០២០ ស្ថិតនៅចំណុចភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង។ សម្ភារៈវត្ថុតាងដកហូតរួមមាន៖
១/.ទូរសព្ទដៃចំនួន០១គ្រឿង ម៉ាក iPhone 16 Pro Max។
២/.ទូរសព្ទដៃចំនួន០១គ្រឿង ម៉ាក Samsung ពណ៌ខ្មៅលាយទឹកប្រាក់។
៣/.ទូរសព្ទដៃចំនួន០១គ្រឿង ម៉ាក Vivo ពណ៌ខ្មៅ។
បច្ចុប្បន្នជនត្រូវចោទ ត្រូវបានការិយាល័យជំនាញកំពុងកសាងសំណុំរឿងបញ្ជូនទៅលោកចៅក្រមស៊ើបសួរ ដើម្បីបន្តនីតិវិធី៕
