កណ្តាល៖ ក្រោយពីទទួលបានព័ត៌មានភ្លាម ដោយអនុវត្តតាមបទបញ្ជាលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល កម្លាំងជំនាញខេត្ត សហការជាមួយកម្លាំងជំនាញក្រុងតាខ្មៅ និងស្រុកស្អាង ធ្វើការស្រាវជ្រាវឈានដល់ការឃាត់ខ្លួនយុវជនក្មេងទំនើងពាក់ព័ន្ធបានចំនួន០៣នាក់ នៅថ្ងៃទី២៨ ខែធ្នូ ឆ្នាំ២០២៤ រួមមាន៖
១.ឈ្មោះ ឡាក់ សុវិរៈ ភេទប្រុស ឆ្នាំកំណើត ២០០៧ ជាសិស្សវិទ្យាល័យស្អាង ទីលំនៅភូមិទទួលក្រូច ឃុំក្រាំងយ៉ូវ ស្រុកស្អាង (ជាអ្នកឌុបបង្ហោះ ធ្លាប់បង្ហោះចំនួន០៤ដង)។
២.ឈ្មោះ ដេត វណ្ណារ៉ា ភេទប្រុស ឆ្នាំកំណើត ២០០៧ ជាសិស្សវិទ្យាល័យស្អាង ទីលំនៅភូមិព្រែកស្នាយ ឃុំព្រែកគយ ស្រុកស្អាង (អ្នកអង្គុយខាងក្រោយ ធ្លាប់បង្ហោះចំនួន០២ដង)។
៣-ឈ្មោះ លីន គីមលី ភេទប្រុស ឆ្នាំកំណើត ២០០៨ ជាសិស្សវិទ្យាល័យស្អាង (អ្នកថត ធ្លាប់បង្ហោះ០១ដង)។
តាមចម្លើយសារភាពរបស់ក្រុមក្មេងទំនើងទាំង០៣នាក់ នៅថ្ងៃទី២៦ ខែធ្នូ ឆ្នាំ២០២៤ក្រុមខ្លួនបានជិះម៉ូតូចំនួន០២គ្រឿងឡើងទៅក្រុងតាខ្មៅ ពេលជិះដល់ចំណុចម្តុំទួលក្រសាំងក៏នាំគ្នាបង្ហោះម៉ូតូ ហើយថតរូបទុក។ លុះដល់ថ្ងៃទី២៧ ខែធ្នូ ឆ្នាំ២០២៤ ក៏បាននាំគ្នាកាត់តបញ្ចូលសំឡេងហើយបង្ហោះលើបណ្តាញហ្វេសប៊ុកតែម្ដង។ បច្ចុប្បន្ន យុវជនទាំង០៣នាក់ខាងលើ រួមទាំងវត្ថុតាង ត្រូវបានឃាត់ខ្លួន នៅអធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធី៕
