សៀមរាប៖ ដូចអ្វីដែលបានគ្រោងទុក កាលពីរាត្រីថ្ងៃទី២៥ ខែធ្នូ ឆ្នាំ២០២៤ក្រុមហ៊ុនអាកាសចរណ៍ Asiana Airlines របស់ប្រទេសកូរ៉េខាងត្បូង បានចាប់ផ្តើមហោះហើរត្រង់ចេញពីអាកាសយានដ្ឋានអន្ដរជាតិ អ៊ីឈុន នៃទីក្រុងសេអ៊ូល មកកាន់អាកាសយានដ្ឋានអន្ដរជាតិសៀមរាប-អង្គរ នៃខេត្ដសៀមរាប ។នេះជាការបានចាប់ផ្តើមដំណើរការជើងហោះហើររបស់ខ្លួនឡើងវិញ បន្ទាប់អាក់ខានដោយសារពីវិបត្ដិជំងឺកូវីដ-១៩ ។
មន្ត្រីអាកាសយានដ្ឋានអន្តរជាតិសៀមរាប-អង្គរ បានឱ្យដឹងថា Asiana Airlines បានចាប់ផ្តើមហោះឡើងវិញ ដោយហោះត្រង់ចេញពីទីក្រុងសេអ៊ូល មកកាន់អាកាសយានដ្ឋានអន្ដរជាតិសៀមរាប-អង្គរ ក្នុងមួយថ្ងៃមួយជើងជារៀងរាល់ថ្ងៃ ចាប់ពីថ្ងៃទី២៥ ខែធ្នូ ឆ្នាំ២០២៤ ដល់ខែមីនា ឆ្នាំ២០២៥ខាងមុខ។ជើងហោះហើរលើកដំបូងនេះបានដំណើរការជោគជ័យ និងបន្ដកិច្ចព្រមព្រៀងជាមួយរដ្ឋលេខាធិការដ្ឋានអាកាសចរណ៍ស៊ីវិលបន្ថែមទៀត។
Asiana Airlines ជាក្រុមហ៊ុនអាកាសចរណ៍ដ៏ធំទី២ របស់កូរ៉េ បន្ទាប់ពីក្រុមហ៊ុនអាកាសចរណ៍ Korean Airlines ហើយប្រតិបត្ដិការហោះថ្មីជើងទី១នេះ ប្រើយន្តហោះប្រភេទអ៊ែបឺស ៣២១ ជាមួយអ្នកដំណើរជិត ២០០នាក់។
នៅចុងឆ្នាំ២០២៤ និងដើមឆ្នាំ២០២៥នេះ មានជើងហោះហើរថ្មីៗជាច្រើនទៀត បានធ្វើកិច្ចព្រមព្រៀងមកកាន់អាកាសយានដ្ឋានអន្ដរជាតិសៀមរាប អង្គរ ។គិតមកដល់ខែធ្នូ ឆ្នាំនេះ ជាមធ្យមមានជើងហោះហើរមកដល់ និងត្រឡប់ទៅវិញ មានចំនួន ៥២ជើងក្នុងមួយថ្ងៃ និងគិតជាមធ្យមមានភ្ញៀវធ្វើដំណើរតាមយន្ដហោះ ទាំងមកដល់ និងត្រឡប់ទៅវិញ ៥.០០០នាក់ក្នុងមួយថ្ងៃ៕
