ព្រះវិហារ៖ ថ្លែងប្រាប់អ្នកសារព័ត៌មាន ក្នុងឱកាសនៃការចុះធ្វើទស្សនកិច្ចសិក្សារបស់អ្នកសារព័ត៌មានជាច្រើនអង្គភាពលើការអនុវត្តកសិអេកូឡូស៊ីនៅចម្ការស្វាយចន្ទីរបស់បងប្អូនប្រជាកសិករមួយកន្លែង នាស្រុករវៀង ខេត្តព្រះវិហារ ក្រោមការរៀបចំឡើងដោយបណ្តាញកសិអេកូឡូស៊ីកម្ពុជា កាលពីចុងសប្តាហ៍កន្លងទៅនេះ លោក ម៉ាំង ប្រុស មន្ត្រីសម្របសម្រួលគម្រោង អាសិត (ASSET) បានថ្លែងថា ការដាក់អង្ក្រងនៅតាមដើមស្វាយចន្ទីគឺមានសារប្រយោជន៍ខ្លាំងណាស់ ដើម្បីជាការការពារដំណាំមួយនេះពីការយាយីពីពពួកសត្វល្អិតចង្រៃផ្សេងៗ ដោយអង្ក្រងនឹងស៊ីសត្វល្អិតចង្រៃកុំឱ្យវាបំផ្លាញស្វាយចន្ទី ជាពិសេសក្នុងកំឡុងពេលដែលស្វាយចន្ទីចេញត្រួយខ្ចី គឺតែងតែមានសត្វល្អិតចង្រៃដែលយើងពិបាកនឹងមើលឃើញដោយភ្នែកទទេវាមកកាត់បំផ្លាញត្រួយ បំផ្លាញផ្កា និងបំផ្លាញក្តឹបស្វាយចន្ទី ដែលនាំឱ្យកសិកររងនូវការខាតបង់ដ៏គួរឱ្យសោកស្តាយ។
លោក ម៉ាំង ប្រុស បានប្រាប់ពីបច្ចេកទេសក្នុងការដាក់អង្ក្រងនៅតាមដើមស្វាយចន្ទីដើម្បីឱ្យវាចាំស៊ីពពួក សត្វចង្រៃថា មុននឹងការដាក់យើងត្រូវសិក្សាឱ្យបានច្បាស់លាស់អំពីពូជ និងអំពីគ្រួសាររបស់អង្ក្រង ព្រោះប្រសិនបើយើងដាក់វាឱ្យនៅជាមួយគ្នាដោយខុសពូជ ខុសគ្រួសារនោះ ប្រាកដណាស់វានឹងខាំគ្នារហូតទាល់តែងាប់រៀងៗខ្លួន។ មួយវិញទៀតមុននឹងដាក់អង្ក្រងយើងក៏ត្រូវសង្កេតមើលថានៅលើដើម ស្វាយចន្ទីនោះមានកត្តាចង្រៃអ្វីខ្លះដូចជាត្រោក និងស្រមោចក្រហមជាដើម នៅពេលដែលយើងដាក់ អង្ក្រងទៅវានឹងខាំគ្នា។ ដូច្នេះមុននឹងដាក់អង្ក្រងយើងចាំបាច់ត្រូវតែកំចាត់ពួកវាចេញជាមុនសិន ក្នុងនោះចំពោះត្រោកយើងអាចយកកន្ត្រៃកាត់វាចេញ ចំណែកស្រមោចក្រហមវិញយើងត្រូវដាក់ចំណីធ្វើជាអន្ទាក់នៅក្នុងកូនចានហើយនៅពេលដែលវានាំគ្នាមកស៊ីយើងត្រូវយកវាទៅជ្រលក់ក្នុងទឹកសាប៊ូដើម្បីឱ្យវាងាប់។
បន្ថែមពីនេះ មន្ត្រីសម្របសម្រួលគម្រោង អាសិត (ASSET) រូបនេះ ក៏បានប្រាប់ពីវិធីថែទាំអង្ក្រងដើម្បីឱ្យវានៅនឹងដើមស្វាយចន្ទីដោយពុំចាញចេញទៅណា ដោយកសិករត្រូវយកអ្វីមួយជ្រលក់ជាមួយប្រេងអ្វីម្យ៉ាងមករុំនៅគល់ស្វាយចន្ទីដើម្បីការពារពួកវាកុំឱ្យចុះទៅណា ហើយបន្ទាប់ពីពួកវាចាប់ផ្តើមកាច់សំបុកហើយយើងត្រូវដាក់ចំណីឱ្យវាស៊ី ដោយចំណីសម្រាប់ពួកវាមានដូចជាពោះវៀនមាន់ ពោះវៀនជ្រូកជាដើម ហើយនៅពេលដែលវាមានចំណីស៊ីគឺពួកវាលែងចេញទៅណាទៀតហើយ ពួកវានឹងកាច់សំបុកនៅលើដើមស្វាយចន្ទីរបស់យើងយ៉ាងត្រឹមត្រូវ ដែលនៅពេលនោះហើយកសិករអាចធ្វើការចងតខ្សែពីដើមមួយទៅដើមមួយ ដើម្បីឱ្យអង្ក្រងធ្វើការផ្លាស់ទីរកចំណីដោយការចាប់ស៊ីសត្វល្អិតចង្រៃដែលចាំបំផ្លាញដំណាំស្វាយចន្ទី។ ជាមួយគ្នានេះ លោក ម៉ាំង ប្រុស ក៏បានរំឭកដល់ប្រជាកសិករពីការប្រើប្រាស់ថ្នាំពុលកសិកម្មផងដែរ ព្រោះថានៅពេលបាញ់ថ្នាំប្រភេទនេះនឹងបណ្តាលឱ្យអង្ក្រងដែល ជាកងទ័ពស្រួចក្នុងការកំចាត់សត្វចង្រៃចាំបំផ្លាញស្វាយចន្ទីនឹងងាប់ តែផ្ទុយទៅវិញកសិករអាចជ្រើស រើសវិធីសាស្ត្រផ្សេងវិញដើម្បីជាការថែរក្សាអង្ក្រងរបស់ខ្លួន។
សូមជម្រាបជូនថា ការអនុវត្តការដាក់អង្ក្រងនៅតាមដើមស្វាយចន្ទីឱ្យវាស៊ីសត្វចង្រៃនៅកម្ពុជា ទើបត្រូវបានធ្វើកាលពីឆ្នាំកន្លងទៅដោយបានរៀនសូត្រពីប្រទេសវៀតណាម ខណៈដែលកិច្ចការនេះត្រូវបានអនុវត្តដោយជោគជ័យរួចហើយនៅយតាមបណ្តាប្រទេសមួយចំនួន៕
