ព្រះសីហនុ៖ លោកឧត្តមនាវីត្រី នួន ឧត្តម មេបញ្ជាការរងមូលដ្ឋានសមុទ្រ បានដឹកនាំនាយនាវី នាយនាវីរងមូលដ្ឋានសមុទ្រ អញ្ជើញជូនដំណើរមាតុភូមិនិវត្តន៍របស់នាវាកងទ័ពជើងទឹកសហរដ្ឋអាមេរិកចំនួន០១គ្រឿង មានឈ្មោះ USS Savannah (LCS-28) នៅកំពង់ផែស្វយ័តក្រុងព្រះសីហនុ កាលពីរសៀលថ្ងៃសុក្រ ទី២០ ខែធ្នូ ឆ្នាំ២០២៤ បន្ទាប់ពីនាវាបានចូលសំចតធ្វើទស្សនកិច្ចនៅព្រះរាជាណាចក្រកម្ពុជា នៅកំពង់ផែស្វយ័តក្រុងព្រះសីហនុ រយៈពេល៥ថ្ងៃរួចមក ដើម្បីពង្រឹងចំណងសាមគ្គីភាព មិត្តភាព កិច្ចសហប្រតិ បត្តិការរវាងរាជរដ្ឋាភិបាល ប្រជាពលរដ្ឋ និងកងទ័ពជើងទឹកប្រទេសទាំងពីរ ជាពិសេសជាការផ្លាស់ប្តូរបទពិសោធន៍ពីគ្នាទៅវិញទៅមក។
ក្នុងឱកាសស្នាក់នៅបំពេញទស្សនកិច្ចនៅព្រះរាជាណាចក្រកម្ពុជា គណៈប្រតិភូនាវាកងទ័ពជើងទឹកសហរដ្ឋអាមេរិក បានចូលជួបសម្តែងការគួរសមជាមួយឯកឧត្តមគណៈបញ្ជាការឯកភាពរដ្ឋបាលខេត្តព្រះសីហនុ និងមន្ត្រីកងកម្លាំងប្រដាប់អាវុធខេត្តព្រះសីហនុ មេបញ្ជាការមូលដ្នានសមុទ្រ និងថ្នាក់ដឹកនាំក្រសួងការពារជាតិមួយចំនួន ព្រមទាំងមានកម្មវិធីលេងកីឡាបាល់ទះមិត្តភាពរវាងកងទ័ពជើងទឹកទាំងពីរកាន់តែមានភាពស្និទ្ធស្នាលបន្ថែមទៀត។
នាវា USS Savannah (LCS-28) មានបណ្ដោយ១២៧,៤ម៉ែត្រ ទទឹង៣១,៦ម៉ែត្រ ជម្រៅទឹក៦,១៩ម៉ែត្រ ទម្ងន់ផ្ទុក៣២៥០តោន ល្បឿន ៤០knots (74 km/h; 46 mph) ប្រសិទ្ធភាពប្រតិបត្តិការ ៤,៣០០ nautical miles (៨,០០០km, ៤,៩០០mi) ចំនួននាវិកសរុបចំនួន១០៣នាក់ ក្នុងនោះនាយទាហាន១៥នាក់ និងមាននាវិក១៥រូប (ស៊ីវិល) ដឹកនាំដោយលោកមេបញ្ជាការនាវា វរនាវីទោ Daniel A. Sledz, និងមានឧទ្ធម្ភាគចក្រ MH-60R/S Seahawk ។
សូមបញ្ជាក់ថា ក្នុងឆ្នាំ២០២៤នេះ ខេត្តព្រះសីហនុ ទទួលនាវាកងទ័ពជើងទឹកបរទេសមួយចំនួនមានដូចជា នាវាកងស្វ័យការពារជើងទឹកជប៉ុន ថៃ វៀតណាម ចិន ឥណ្ឌូនេស៊ី ចក្រភពអង់គ្លេស កូរ៉េខាងត្បូង និងសហរដ្ឋអាមេរិក៕
