ភ្នំពេញ៖ «ក្នុងដំណើរការរយៈពេល ៣ថ្ងៃ នៃពិព័រណ៍សៀវភៅកម្ពុជា លើកទី១១ ក្រោមប្រធានបទ៖ «អ្នកអាន ជាអ្នករៀនពេញមួយជីវិត» នេះ សៀវភៅ «គោលធម៌ព្រះត្រៃបិដក» ទទួលបានការចាប់អារម្មណ៍យ៉ាងខ្លាំងពីសំណាក់មហាជន ជាពិសេសព្រះសង្ឃ »។ នេះបើតាមអ្នកនាង ទូច សាអែម សមាជិកានៃសមាគមអក្សរសាស្ត្រ និងវប្បធម៌ខ្មែរ ដែលបានចូលរួមនៅក្នុងពិព័រណ៍សៀវភៅនេះ។
ទន្ទឹមនេះ អ្នកនាង ទូច សាអែម បានគូសបញ្ជាក់ថា សៀវភៅនេះ ក៏ស័ក្ដិសមសម្រាប់ប្អូនៗសិក្សានុសិស្ស ចាប់ពីថ្នាក់ទី១២ ឡើងទៅ អាចអានបាន ដើម្បីបង្កើនចំណេះដឹង ព្រោះក្នុងវិស័យអំណាន មិនមានរើសប្រភេទសៀវភៅឡើយ មិនថាសៀវភៅគតិអប់រំជាភាសាខ្មែរ ឬបរទេស និង សៀវភៅប្រលោមលោក នោះទេ សុទ្ធតែមានប្រយោជន៍ទាំងអស់ ក្នុងការដុះខាត់ចំណេះដឹង និងបញ្ញាស្មារតី ។
អ្នកនាង ទូច សាអែម បានរ៉ាយរ៉ាប់ឱ្យដឹងថាសមាគមអក្សរសាស្ត្រ និងវប្បធម៌ខ្មែរ ក្រោមការដឹកនាំរបស់លោកសាស្ត្រាចារ្យ ទូច គឹមស្រ៊ាង បានដកស្រង់ និងរៀបរៀងសៀវភៅមួយក្បាលឈ្មោះ «គោលធម៌ព្រះត្រៃបិដក» ដើម្បីសម្រួលក្នុងការអាន និងចងចាំ ។ ការរៀបរៀងឡើងវិញនេះ ពីព្រោះគម្ពី «ព្រះត្រៃបិដក» ច្បាប់ដើមសរសេរជាភាសាបាលីច្រើន ដូច្នេះបានបង្កភាពលំបាកសម្រាប់ការអាន ជាពិសេសសម្រាប់សិក្សានុសិស្ស និងពុទ្ធសាសនិកទូទៅ ។
អ្នកនាង ទូច សាអែម បានឱ្យដឹងទៀតថា សៀវភៅ «គោលធម៌ព្រះត្រៃបិដក» គឺបានដកស្រង់តែចំណុចសំខាន់ៗ ហើយខ្លឹមប៉ុណ្ណោះ ពីគម្ពីព្រះត្រៃបិដកដែលមានចំនួន ១១០ ក្បាល និងសរសេរជាភាសាខ្មែរ លាយបាសាបាលីតិចតួចបំផុត ។ អ្នកនាងបន្តថា សៀវភៅ «គោលធម៌ព្រះត្រៃបិដក» នេះ ត្រូវបានចំណាយពេលក្នុងការរៀបរៀងរហូតដល់រយៈពេល ១ឆ្នាំ ក្នុងនោះមាន ៨១៤ មាតិការ និង ៣៦៥ទំព័រ ។ ហើយសម្រាប់ដំណើរការនៃការរៀបរៀងឡើងវិញនេះ គឺធ្វើឡើងដោយមានគណៈកម្មការចំនួន ៣ គឺគណៈកម្មការតែងនិពន្ធ, គណៈកម្មការត្រួតពិនិត្យអក្ខរាវិរុទ្ធ និងគណៈកម្មការសម្រួលផ្នែកបច្ចេកទេស ។
ចំពោះអត្ថប្រយោជន៍សៀវភៅនេះវិញ ត្រូវបានអ្នករៀបរៀងអះអាងថាគម្ពី «ព្រះត្រៃបិដក» ពិតជាមានសារៈសំខាន់ និងមានឥទ្ធិពលខ្លាំង នៅក្នុងវិស័យអប់រំ ។
គម្ពី «ព្រះត្រៃបិដក» ជាទីរួបរួមពុទ្ធវចនៈ, ជាតំណាងអង្គព្រះបរមសាស្តារបស់ពុទ្ធសាសនិក ព្រោះជាទីចារឹក ព្រះធម្មវិន័យ និង ជាប្រភពដើមនៃព្រះធម្មវិន័យរបស់ព្រះពុទ្ធសាសនា ។ល។ យ៉ាងណាក៏ដោយ អ្នករៀបរៀងសៀវភៅនេះ បានកត់សំគាល់ឃើញថា មានពុទ្ធសាសនិកមួយចំនួនធំ ស្ទើរតែពេញមួយជីវិតរបស់ពួកគាត់មិនទាន់បានអាន គម្ពី «ព្រះត្រៃបិដក» ផង ៕
