បាត់ដំបង៖ នៅថ្ងៃទី២០ ខែធ្នូ ឆ្នាំ២០២៤ វេលាម៉ោង១១និង៣០នាទី ផ្លូវជាតិលេខ 160T នៅចំណុចភូមិព្រៃទទឹង២ ឃុំបួវិល ស្រុកបវេល ខេត្តបាត់ដំបង មានករណីគ្រោះថ្នាក់ចរាចរណ៍មួយកើតឡើង រវាងរថយន្តនិងម៉ូតូ បណ្តាលឲ្យស្លាប់ម្នាក់ និងរងរបួសម្នាក់ ។
លោកវរសេនីយ៍ឯក សុខ សារិន អធិការនគរបាលស្រុកបវេល បានរាយការណ៍ឲ្យដឹងថា ៖ គ្រោះថ្នាក់ចរាចរណ៍នេះ មានម៉ូតូហុងដាឌ្រីម ពណ៍ខ្មៅ គ្មានពាក់ស្លាក់លេខ សេរីឆ្នាំ២០២៤ អ្នកបើកបរឈ្មោះ សាវួត វណ្ណៈ ភេទប្រុស អាយុ១៥ឆ្នាំ រស់នៅភូមិពីងពង់ ឃុំល្វា ស្រុកបវេល ខេត្តបាត់ដំបង (រងរបួសធ្ងន់) និងអ្នករួមដំណើរឈ្មោះ ធឿន ប៊ុនលាភ ភេទប្រុស អាយុ ១៤ឆ្នាំ រស់នៅភូមិដីឡូ ឃុំល្វា ស្រុកបវេល ខេត្តបាត់ដំបង (ស្លាប់នៅនិងកន្លែងកើតហេតុ) បុកនិងរថយន្ត ម៉ាកហានដាយ ពណ៍ស ពាក់ស្លាកលេខ កំពង់ចាម 3A-3723 សេរីឆ្នាំ១៩៩៩ អ្នកបើកបរឈ្មោះ សី សុខខុន ភេទប្រុស អាយុ៦២ឆ្នាំ រស់នៅភូមិថ្នល់ដាច់ ឃុំដានរុន ស្រុកសូនិគមន៍ ខេត្តសៀមរាប ។
តាមការពិនិត្យកន្លែងកើតហេតុ កម្លាំងនគរបាលជំនាញ នៃអធិការដ្ឋាននគរបាលស្រុកបវេល បានបញ្ជាក់ដឹងថា៖ រថយន្តបានធ្វើដំណើរពីទិសខាងជើងឆ្ពោះទៅទិសខាងត្បូង លុះមកដល់ចំណុចកើតហេតុ ស្រាប់តែមានម៉ូតូមួយគ្រឿងដែលបានធ្វើដំណើរក្នុងទិសច្រាសទិសដៅគ្នា បើកបរក្នុងល្បឿនលឿន បានឡើងវ៉ាជែងម៉ូតូដែលកំពុងធ្វើដំណើរស្របទិសគ្នាហើយក៏ជ្រុលទៅបុកចំពេញទំហឹងជាមួយរថយន្ត ដែលធ្វើដំណើរបញ្ច្រាសទិសដៅគ្នាតែម្ដង ។
បច្ចុប្បន្ន នគរបាលស្រុកបវេលបានយកមធ្យោបាយបង្ក និងវត្ថុតាងបានយកទៅរក្សាទុក នៅការិយាល័យចរាចរណ៍ខេត្ត ដើម្បីដោះស្រាយតាមនីតីវិធី ។ ចំណែកឯសាកសពជនរងគ្រោះ សមត្ថកិច្ចបានធ្វើកំណត់ហេតុ និងប្រគល់ទៅក្រុមគ្រួសារសាច់ញាតិយកទៅធ្វើបុណ្យតាមប្រពៃណី៕
