ភ្នំពេញ៖ កាលពីថ្ងៃទី១៧ ខែធ្នូ ឆ្នាំ២០២៤កន្លងទៅថ្មីៗនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ក្នុងពិធីបើកការដ្ឋាន “គម្រោងអភិវឌ្ឍន៍ទីក្រុងរណប” ថ្មីមួយទៀតដែលស្ថិតនៅខាងកើតរាជធានីភ្នំពេញ ដែលមានឈ្មោះថា “ទីក្រុងរណបមេគង្គឃី” ខណៈដែលគេដឹងថា រាជធានីភ្នំពេញមានទីក្រុងរណបជាច្រើនកន្លែងរួចមក។ “ទីក្រុងរណបមេគង្គឃីមេគង្គឃី” ជាទីក្រុងរណបទី១ របស់ខេត្តកណ្ដាលដែលស្ថិតនៅត្រើយម្ខាងនៃទន្លេមេគង្គ ទល់មុខនឹងព្រះបរមរាជវាំង និងអភិវឌ្ឍដោយក្រុមហ៊ុន ធីភី ម៉ូរ៉ាល់ គ្រុប លើផ្ទៃដីសរុបជាង ២១០ហិកតា ស្ថិតនៅសង្កាត់អរិយក្សត្រ ក្រុងអរិយក្សត្រ ខេត្តកណ្តាល។
សំណួរនៅទីនេះ គឺបន្ថែមដោយទីក្រុងរណបថ្មីនៅខេត្តកណ្ដាល ចំណែករាជធានីភ្នំពេញមានទីក្រុងរណបចំនួនប៉ុន្មាន? លើបណ្ដាញសង្គមហ្វេសប៊ុកផ្លូវការរបស់រដ្ឋបាលក្រុងអរិយក្សត្រអធិប្បាយថា រាជធានីភ្នំពេញមានទីក្រុងរណបចំនួន៧ ក្នុងនេះ ៖
(១) ទីក្រុងកោះពេជ្រ៖ អភិវឌ្ឍដោយក្រុមហ៊ុន OCIC ក្នុងឆ្នាំ២០០៦ ដែលមានផ្ទៃដីសរុបជាង ១០០ហិកតា,(២) កាំកូស៊ីធី៖ អភិវឌ្ឍដោយក្រុមហ៊ុនកូរ៉េ World City ក្នុងឆ្នាំ២០០៦ ដែលមានផ្ទៃដីសរុបជាង ១១៩ហិកតា,(៣) បឹងកក់ស៊ីធី៖ អភិវឌ្ឍដោយក្រុមហ៊ុន Shukaku ក្នុងឆ្នាំ២០០៧ ដែលមានផ្ទៃដីសរុបជាង ១១៤ហិកតា,(៤) ទីក្រុងជ្រោយចង្វារ៖ អភិវឌ្ឍដោយក្រុមហ៊ុន OCIC ក្នុងឆ្នាំ២០១១ ដែលមានផ្ទៃដីសរុបជាង ៣០០ហិកតា,(៥) ហ្គាឌិនស៊ីធី៖ អភិវឌ្ឍដោយក្រុមហ៊ុនលោកឧកញ៉ា លី យ៉ុងផាត់ ក្នុងឆ្នាំ២០១២ ដែលមានផ្ទៃដីសរុបជាង ១០០០ហិកតា,(៦) ហ្គ្រេនភ្នំពេញស៊ីធី៖ អភិវឌ្ឍដោយក្រុមហ៊ុនជីប ម៉ុង ក្នុងឆ្នាំ២០១៩ ដែលមានផ្ទៃដីសរុបជាង ២៦០ហិកតា,(៧) ទីក្រុងកោះនរា៖ អភិវឌ្ឍដោយក្រុមហ៊ុន OCIC ក្នុងឆ្នាំ២០២០ ដែលមានផ្ទៃដីសរុបជាង ១២៥ហិកតា។
“ទីក្រុងរណបមេគង្គឃី”មានផ្ទៃដីសរុបជាង ២១០ហិកតា ស្ថិតនៅសង្កាត់អរិយក្សត្រ ក្រុងអរិយក្សត្រ ខេត្តកណ្តាល។ ការបង្កើតទីក្រុងរណបថ្មីនេះត្រូវបានគេរពឹងទុកថានឹងធ្វើឲ្យមានការផ្លាស់ប្តូរមុខមាត់ថ្មីលើទឹកដីក្រុងអរិយក្សត្រ តាមរយៈការអភិវឌ្ឍលើហេដ្ឋារចនាសម្ព័ន្ធផ្លូវថ្នល់ តំបន់ពាណិជ្ជកម្ម លំនៅឋាន បដិសណ្ឋាកិច្ច អប់រំ សុខាភិបាល ទេសចរណ៍ និងវប្បធមន៍ ដោយរក្សាទុកផ្ទៃប្រមាណ ៧០ហិកតាសម្រាប់សួនច្បារសាធារណៈ និងហេដ្ឋារចនាសម្ព័ន្ធផ្លូវថ្នល់រួមទាំងផ្លូវទ្បានក្រុងសាធារណៈ ថ្មើជើង និងកង់ផងដែរ៕
