ព្រះសីហនុ៖ លោកវរនាវីឯក មាន សាវឿន មេបញ្ជាការរងមូលដ្ឋានសមុទ្ររាម ដឹកនាំនាយនាវី នាយនាវីរង និងពលនាវិក នាព្រឹកថ្ងៃព្រហស្បតិ៍ ទី១២ ខែធ្នូ ឆ្នាំ២០២៤ បានអញ្ជើញទទួលស្វាគមន៍នាវាកងទ័ពជើងទឹកសាធារណរដ្ឋកូរ៉េចំនួន០១គ្រឿង ឈ្មោះ Wang Geon Destroyer (DDH-978) ដឹកនាំដោយវរនាវីឯក Chio Jong Soo មេបញ្ជាការនាវា កងទ័ពជើងទឹកសាធារណរដ្ឋកូរ៉េ បានចូលចតនៅកំពង់ផែស្វយ័តក្រុងព្រះសីហនុ ក្នុងគោលបំណងធ្វើទស្សនកិច្ចនៅព្រះរាជាណាចក្រកម្ពុជា រយៈពេល ៣ថ្ងៃ គឺចាប់ពីថ្ងៃទី១២ ដល់ថ្ងៃទី១៤ ខែធ្នូ ឆ្នាំ២០២៤។
ដំណើរបំពេញទស្សនកិច្ចនៅព្រះរាជាណាចក្រកម្ពុជា រយៈពេល៣ថ្ងៃ ដើម្បីពង្រឹងកិច្ចសហប្រតិបត្តិការ បង្កើនទំនាក់ទំនង និងរឹតចំណងសាមគ្គីភាព មិត្តភាពឱ្យកាន់តែល្អទ្វេឡើងថែមទៀត រវាងប្រទេសទាំងពីរ និងប្រជាជននៃប្រទេសទាំងពីរ (កម្ពុជា-កូរ៉េ)។
ក្នុងការចូលចតនៅកម្ពុជា គណ:ប្រតិភូកងទ័ពជើងទឹកកូរ៉េ មានគម្រោងចូលជួបសម្តែងការគួរសមជាមួយអភិបាលខេត្តព្រះសីហនុ មេបញ្ជាការមូលដ្ឋានសមុទ្រ ថ្នាក់ដឹកនាំក្រសួងការពារជាតិ និងក៏មានកម្មវិធីប្រកួតកីឡាមិត្តភាពផងដែរ។
សូមជម្រាបជូនថា នាវា Wang Geon Destroyer (DDH-978) បណ្តោយ ១៤៩,៥ម៉ែត្រ ទទឹង ១៧,៤ម៉ែត្រ កម្ពស់ ៣៩,២៤ម៉ែត្រ ជម្រៅទឹក ៧,៣ម៉ែត្រ និងមានទម្ងន់ផ្ទុកសរុប ៥៥៨២តោន ល្បឿន ៣០kts ដឹកនាំដោយមេបញ្ជាការនាវា លោកវរនាវីឯក Chio Jong Soo៕
