កណ្តាល៖ ដោយអនុវត្តតាមបទបញ្ជារបស់ លោកឧត្តមសេនីយ៍ទោ ឈឿន សុចិត្ត ស្នងការ នៃស្នងការដ្ឋាននគរបាលខេត្តកណ្តាល នៅយប់ថ្ងៃទី០៤ ខែធ្នូ ឆ្នាំ២០២៤ កម្លាំងនគរបាលនៃអធិការដ្ឋាននគរបាលក្រុងតាខ្មៅ ដឹកនាំបញ្ជាដោយលោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ ផ្នែកនគរបាលព្រហ្មទណ្ឌក្រុងតាខ្មៅ ល្បាតលើដងផ្លូវ ដោយសហការជាមួយ ប៉ុស្តិ៍នគរបាលរដ្ឋបាលសិត្បូ និង រកាខ្ពស់ ចំណុច ស្តុបសិត្បូ (មហាវិថីសុីជីនពីង) កែងផ្លូវ២១អា ប្រទះឃើញជនសង្ស័យ២នាក់ជិះម៉ូតូ Honda DreamC125 ពណ៍ខ្មៅ ដែរមានជនរងគ្រោះស្រែកថាចោរជួយចាប់ផង ភ្លាមៗនគរបាលយើងបានប្រដេញតាមពីក្រោយ រហូតដល់ចំណុចផ្លូវកោងវត្តឈូងលាភ ជនសង្ស័យដួលម៉ូតូក៏ឈានដល់ការឃាត់ខ្លួនសង្ស័យបានភ្លាមចំនួន០១នាក់ បន្ទាប់មកផ្នែកព្រហ្មទណ្ឌក្រុងតាខ្មៅ បានសហការ ជាមួយការិយាល័យព្រហ្មទណ្ឌកម្រិតធ្ងន់ និង ការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកណ្តាល ស៊ើបអង្កេត ឃាត់ខ្លួនបាន០១នាក់ទៀត ដែរជាម្ចាស់ម៉ូតូផ្តល់មធ្យោបាយឲ្យក្រុមជនសង្ស័យទាំងនោះ ជិះធ្វើសកម្មភាព ។
ពាក់ព័ន្ធករណីលួចមានស្ថានទម្ងន់ទោសនិងសំគំនិតក្នុងអំពើលួច (វាយប្លន់យកម៉ូតូ) ជនសង្ស័យបានសារភាពថាក្រុមខ្លួន ធ្លាប់បានធ្វើសកម្មភាពដេញប្លន់បានចំនួន០៣ករណី ។ បច្ចុប្បន្នជនសង្ស័យ និងវត្ថុតាងខាងលើ សមត្ថកិច្ចជំនាញ បានកសាងសំណុំរឿងចាប់បញ្ជូនទៅតុលាការ ចាត់ការតាមនីតិវិធី៕
