សៀមរាប៖ យោងតាមរបាយការណ៍របស់មន្ទីរទេសចរណ៍ខេត្តសៀមរាប បានបង្ហាញថា ចំនួនភ្ញៀវទេសចរចូលមកទស្សនាខេត្តសៀមរាប ក្នុងថ្ងៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នាថ្ងៃទី១៥ ខែវិច្ឆិកា ឆ្នាំ២០២៤ មានចំនួនប្រមាណ ១៩១,៨៦៣ នាក់ មានការកើនឡើងប្រមាណ១៥.៣៦% បើប្រៀបធៀបរយៈពេលដូចគ្នាឆ្នាំ២០២៣ ចំនួន១៦៦,៣១៧នាក់ ក្នុងនោះ ទេសចរបរទេសមានចំនួន ៤,៨៦៣ នាក់ មានការកើនឡើង៤៦.៦១% បើប្រៀបធៀបរយៈពេលដូចគ្នាឆ្នាំ២០២៣ ចំនួន ៣,៣១៧នាក់។ ទេសចរជាតិ និងបងប្អូនប្រជាពលរដ្ឋក្នុងខេត្តសៀមរាបមានចំនួនប្រមាណ ១៨៧,០០០ នាក់ មានការកើនឡើងប្រមាណ១៤.៧២% បើប្រៀបធៀបរយៈពេលដូចគ្នាឆ្នាំ២០២៣ ចំនួន ១៦៣,០០០ នាក់។
ដោយឡែកសម្រាប់រយៈពេល២ថ្ងៃ ១៤-១៥ ខែវិច្ឆិកា ឆ្នាំ២០២៤ ខេត្តសៀមរាប ទទួលបានទេសចរសរុបប្រមាណ ២៧៨,៩៨២ នាក់ មានការកើនឡើងប្រមាណ ១៣.០១% បើប្រៀបធៀបនឹងរយៈពេលដូចគ្នាឆ្នាំ២០២៣ ចំនួន ២៤៦,៨៦៧ នាក់ ក្នុងនោះ ទេសចរបរទេសមានចំនួន ៨,៩៨២ នាក់ មានការកើនឡើង ៣០.៨០% បើប្រៀបធៀបនឹងរយៈពេលដូចគ្នាឆ្នាំ២០២៣ ចំនួន ៦,៨៦៧ នាក់ ។ ទេសចរជាតិ និងបងប្អូនប្រជាពលរដ្ឋក្នុងខេត្តសៀមរាប មានចំនួនប្រមាណ ២៧០,០០០ នាក់ កើន១២.៥០% បើប្រៀបធៀបនឹងរយៈពេលដូចគ្នាឆ្នាំ២០២៣ ចំនួន ២៤០,០០០ នាក់។
សូមបញ្ជាក់ថា ដើម្បីអបអរសាទព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក រដ្ឋបាលខេត្តសៀមរាបបានរៀបចំកម្មវិធីប្រណាំងទូកចាប់ពីថ្ងៃទី១៤-១៥ ខែ វិច្ឆិកា ឆ្នាំ២០២៤ នៅតាមបណ្តោយដងស្ទឹងសៀមរាប ដែលក្នុងកម្មវិធីនោះក៏មានរៀបចំនូវកម្មវិធីកម្សាន្តផ្សេងៗដូចជា ការប្រណាំងទូកងខ្នាតតូច (ចំណុះ ២២នាក់) ការបណ្តែតប្រទីប ការអុំទូកកម្សាន្តតាមដងស្ទឹងសៀមរាប ការតាំងលក់ផលិតផល និងការប្រគុំតន្ត្រីសម័យជាដើម៕
