សៀមរាប៖ ទោះជាមិនទាន់មានតួលេខសរុបនៅឡើយក៏ដោយ ក៏តាមរយៈរូបភាព ដែលបង្ហាញលើបណ្ដាញសង្គមហ្វេសប៊ុកនៅព្រឹកថ្ងៃទី១៤ ខែវិច្ឆិកា ឆ្នាំ២០២៤ ដែលជាថ្ងៃដំបូងនៃព្រះរាជពិធីបុណ្យអុំបីថ្ងៃនៅខេត្តសៀមរាបឃើញថា ភ្ញៀវទេសចរជាតិ និងអន្តរជាតិយ៉ាងច្រើនកុះករ បានសម្រុកមកទស្សនាប្រាសាទអង្គរវត្ត ។
អាជ្ញាធរជាតិអប្សរាដដែលបានបញ្ជាក់ថា រមណីយដ្ឋានអង្គរសូមស្វាគមន៍ទេសចរជាតិ និងអន្តរជាតិពីគ្រប់ទិសទី អញ្ជើញមកកម្សាន្តក្នុងឱកាសនៃពិធីបុណ្យអុំទូក។ សូមការធ្វើដំណើរកម្សាន្តប្រកបដោយសុខសុវត្ថិភាព និងភាពសប្បាយរីករាយ។
សូមជម្រាបថា រយៈពេល៩ខែឆ្នាំ២០២៤នេះ កម្ពុជារកចំណូលបានជាង៣២លានដុល្លារ ពីការលក់សំបុត្រជូនភ្ញៀវទេសចរ ចូលទស្សនារមណីយដ្ឋានអង្គរ។តាមសេចក្តីប្រកាសព័ត៌មានរបស់គ្រឹះស្ថានអង្គរនៅថ្ងៃទី១ ខែតុលា បញ្ជាក់ថារយៈពេល ៩ខែមកនេះ ភ្ញៀវទេសចរចំនួន៦៩៩ ៨៥០នាក់ បានទិញសំបុត្រចូលទស្សនាអង្គរ គឺកើន៣០ភាគរយបើធៀបរយៈពេលដូចគ្នាឆ្នាំ២០២៣។ ដោយឡែក គ្រឹះស្ថានអង្គរក៏បានលក់សំបុត្រជូនភ្ញៀវចំនួនជិត ១.៤ម៉ឺននាក់ សម្រាប់ចូលទស្សនាប្រាសាទកោះកេរ ដោយទទួលបានចំណូលជាង ២០ម៉ឺនដុល្លារ និងលក់សំបុត្រជិះទូកកម្សាន្តនៅកំពង់ផែចុងឃ្នៀសទទួលចំណូលជាង ៥៥ម៉ឺនដុល្លារផងដែរ៕
