កំពត៖ គម្រោងស្ដារ និងលើកកម្រិតគុណភាពផ្លូវជាតិលេខ៣១ ប្រវែងសរុប ៥៣,៥៤ គីឡូម៉ែត្រ ចាប់ពីផ្លូវបែកគុសចំណុចប្រសព្វ ផ្លូវជាតិលេខ៣ រហូតទៅដល់ទីរួមស្រុកកំពង់ត្រាចចំណុចតភ្ជាប់ផ្លូវជាតិលេខ៣៣ ស្ទើរតែរួចរាល់ហើយ ។វឌ្ឍនភាពនេះស្របពេលដែលរដ្ឋបាលខេត្តកំពតកំពុងមមាញឹករៀបចំទីតាំងសម្រាប់ប្រារព្ធបុណ្យលើកទី១១នៅខែធ្នូខាងមុខនេះដែរ។
ប្រភពរបាយការណ៍វឌ្ឍនភាពនៃការស្ដារ និងលើកកម្រិតគុណភាពផ្លូវជាតិលេខ៣១ បានឱ្យដឹងថាគម្រោងនេះសម្រេច បាន៩៨,៦៨ភាគរយហើយ គិតត្រឹមចុងខែតុលា ឆ្នាំ២០២៤នេះ។ចំណែកការងារអ៊ុតកៅស៊ូ ACទាំង២ស្រទាប់បានបញ្ចប់ ១០០ភាគរយ។ ចំពោះការងារបំពាក់សម្ភារសុវត្តិភាពចរាចរណ៍(គំនូសចរាចរណ៍ ផ្លាកសញ្ញា ផ្លាកបង្ហាញទិសផ្លូវ របារ-Guardrail និងការងារចាំបាច់ផ្សេងៗក៏បានបញ្ចប់ស្ទើររួចរាល់ហើយដែរ។
គប្បីជម្រាបជូនថា ផ្លូវជាតិលេខ៣១ មានប្រវែងសរុបប្រមាណ ៥៣,៥៣គីឡូម៉ែត្រ គ្រោងចំណាយថវិកាជាង ៦០លានដុល្លារ ដែលជាឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ និងពន្ធអាករផ្សេងៗ។
លើវិស័យហេដ្ឋារចនាសម្ព័ន្ធនៅទិសឆ្ពោះទៅខេត្តតំបន់ឆ្នេរសមុទ្រនេះដែរ រាជរដ្ឋាភិបាលមានគម្រោងសាងសង់កែលម្អផ្លូវ ជាតិលេខ៣១, លេខ៣៣ ,លេខ៤១ ក្នុងពេលជាមួយគ្នា ដើម្បីឱ្យបណ្តាញផ្លូវជាតិប្រទាក់ក្រឡាគ្នា និងតភ្ជាប់ពីខេត្តកែប ជាមួយផ្លូវជាតិលេខ៣ដែលទើបបានសាងសង់ចប់ជាស្ថាពរនាពេលកន្លងទៅថ្មីៗ ។
លទ្ធផលនៃគម្រោងស្ដារនិងលើកកម្រិតគុណភាពផ្លូវជាតិលេខ៣១និងសំណង់ហេដ្ឋារចនាសម្ព័ន្ធនានាខាងលើស្របពេល ដែលរដ្ឋបាលខេត្តកំពតត្រៀមធ្វើជាម្ចាស់ផ្ទះរៀបចំពិធីបុណ្យសមុទ្រ លើកទី១១ ឆ្នាំ២០២៤ ក្រោមប្រធានបទ”អបអរសាទរ បេតិកភណ្ឌនិងចីរភាព នៃតំបន់ឆ្នេរ” ដែលនឹងប្រព្រឹត្ត ទៅចាប់ពីថ្ងៃទី១៣ ដល់ថ្ងៃទី១៥ ខែធ្នូ ឆ្នាំ២០២៤ ខាងមុខនេះ នៅបរិវេណឆ្នេរ ចន្លោះស្ពានឥន្ធធនូ និងស្ពានថ្ម។ ពិធីបើកជាផ្លូវការនឹងប្រព្រឹត្តិទៅនាថ្ងៃសៅរ៍ ១៤កើត ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៤ ខែធ្នូ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត៕
