កាលពីរាត្រីថ្ងៃទី២៧ ខែកញ្ញា ឆ្នាំ២០២៤ក្នុងតំបន់ផាប់ស្រ្ទីតនាទីក្រុងសៀមរាប មានការដាក់តាំងម្ហូបអាហារនំចំណីមកពីហាងល្បីៗក្នុងខេត្តសៀមរាបជិត១០០ជូនភ្ញៀវទេសចរជាតិនិងបរទេសភ្លក់ក្នុងឱកាសទិវាទេសចរណ៍ពីភពលោក ក្រោមប្រធានបទ”ទេសចរណ៍ និងសន្តិភាព” ដែលរៀបចំឡើងដោយរដ្ឋបាលខេត្តសៀមរាប ។
ក្នុងព្រឹត្តិការណ៍ទេសចរណ៍ពិភពលោករដ្ឋបាលខេត្តបានរៀបចំការដង្ហែក្បួនចាប់ពីសួនច្បារព្រះរាជដំណាក់តាមបណ្តោយផ្លូវស៊ីវុត្ថា ឆ្ពោះមកតំបន់ផាប់ស្រ្ទីតដែលជាតំបន់ទេសចរណ៍សំខាន់ពេលរាត្រី ដោយមានអង្គភាព មន្ទីរនានា ធុរកិច្ចរកស៊ីវិស័យទេសចរណ៍ ក្នុងនោះក៏មានម្ចាស់ បុគ្គលិក សណ្ឋាគារ ផ្ទះសំណាក់ ភោជនីយដ្ឋាន អាហារដ្ឋាន ក្រុមយុវជន ក្រុមឆៃយ៉ាំ ក្រុមគុនខ្មែរល្បុក្កតោយ៉ាងច្រើនកុះករ។
ពេលរាត្រីម្ចាស់ភោជនីយដ្ឋាន អាហារដ្ឋាន បានយកនំ ចំណី និងម្ហូបអាហារដែលមានជិត១០០មុខ មកដាក់ជូនភ្ញៀវជាតិ និងអន្តរជាតិ ដែលមកកម្សាន្តនៅផាប់ស្រ្ទីត ភ្លក់ដោយមិនគិតប្រាក់។ភ្ញៀវទេសចរជាច្រើនបានភ្លក់និងពោលសរសើរថា មានរសជាតិឆ្ងាញ់។
ក្នុងឱកាសនេះដែរក្រុមអាជីវករលក់ដូរនៅក្នុងតំបន់ផាប់ស្រ្ទីត បានថ្លែងអំណរគុណរដ្ឋបាលខេត្តសៀមរាបដែលបាន យកចិត្តទុកដាក់បង្កើតកម្មវិធីថ្មីៗដើម្បីទាក់ទាញទេសចរជាតិ និងអន្តរជាតិមកកម្សាន្តខេត្តសៀមរាប។
ចំណែកលោក ង៉ូវ សេងកាក់ អភិបាលរងខេត្តសៀមរាបបានមានប្រសាសន៍ រាជរដ្ឋាបាលភិបាលនីតិកាលទី៧ដឹកនាំដោយ សម្តេច ធិបតី ហ៊ុន ម៉ាណែត នាយករដ្ឋមន្រ្តីកម្ពុជាបានយកចិត្តទុកដាក់ខ្ពស់ចំពោះវិស័យទេសចរណ៍៕
